Thailand-a bus chhawng chesualin thingkung a su a, mi 14 an thi.

Online-a thlalak darh thenkhatah chuan bus hi a hma lam a bung hmawk a, a hnung lam chu kawng sira a awm laiin a bung thenkhat chu thingah a tang hlawm.

An ram chhim lama tuipui kan province, Prachuap Khiri Khan-a chetsualna thlengah hian mi 32-in hliam an tuar bawk.

Thailand hi khawvel pum huap pawha lirthei chesual a tamna ram a ni a, kum tin mi sang tel thi an awm thin.

An ram kawngpui lun takin enkawl that a hlawh loh bakah an lirthei pawh a that tawk loh vanga puh a ni thin.

Kum 2022 ringawtah pawh khan Thailand kawngpuia chetsualna thleng avangin mi 15,000 chuang an thi niin Road Accidents Data Centre chuan a chhinchhiah a. Mihring cheng an tlem daih zawkna, UK-ah chuan mi 1,700 vel chauh an thi thung.

Kum 2021-ah pawh khan World Health Organization chuan an rama thihna thleng zinga hmun thuma thenkhat hmun khat dawn chu lirthei chetsualna kaihhnawih a nih thu a sawi bawk.

Thawhtanni zana thil thleng hi a chhan hriat a la ni lo va; mahse, police chuan a khalhtu hian mut a hmu tlem lutuk niin an sawi tiin AFP chuan a tar lang.

Amah pawh hian hliam na tak a tuar a. Thuneituten a thisena zu awm zat pawh an endik nghal bawk niin news agency hian a tar lang.

Police chuan chhiatna thlenga thite hi tute nge an ni tih hriat tumin an bei mek.

Prachuap Khiri Khan hi a tuipui kam, puk awm leh kea hawi khawthawnna nuam a nih avangin khualzinten an hre larin tlawh a hlawh hle.

Chhanchhuah hna thawktute hian ruang leh hliam tuarte la chhuak turin ‘darkar tam tak’ hun an hmang niin a puitu, Sawang Prachuap Dhammasathan Foundation chuan a sawi.

An Facebook account-a thlalak an dah chhuahah chuan chhanchhuaktu eng emaw zatin thingkungin a nek chep tlat bus pawh chhuah tumin an bei nasa hle tih a lang a. Mi thenkhatin a chhung luh nan a tukverh an vaw keh bawk.

Kum thum liam ta chhungin Thailand-ah hian lirthei chesual avanga thi hi tlahniam hret hret mah se khawvelah chetsualna a tamna ram 10 zingah a la lang reng tho.

Mipuiin himna lam ngaihtuah a ngaih thu tlangaupui ve fo bawk mah se inthlan campaign laia chuhtute zinga sawi chhuak an awm ngai mang lo.

Lirthei chesuala thihna thleng tam ngaimawh a hlawh loh chhan hi a thi zinga 70% chuang mah hi motorbike khalhtu an ni a, hengho hi khawtlanga a rethei deuh, thingtlang kawng zawh nasa an nih vang a ni pakhat.

Thailand pumah hian helmet khum tura intihna hi kenkawh a ni mang lo va. An thenawm lawka Vietnam leh Indonesia-ah khauh taka kenkawh a ni thung a, zu ruih chu chetsualna thlentu langsar tak a ni bawk.

Thailand-a sorkar ding tawhte hi khawpuia cheng mi hausa zawkte thlawp an ni deuh zel bawk.

An kawngpuite hi chak tak taka tlan nan a tha tawk em em hlawm a; mah se, light leh marking a awm tha lo va, chu chu chetsualna thlen theitu pakhat a ni.

Tlan chak lutuk hi hrem theih an ni a; mahse, hrem an awm tam lo hle a, chawi pawh a tlem bawk.

Thai driver zingah an nungchang leh awm dan avanga lirthei khalh thei lo tura tih an awm ngai mang lo.