August 29, 2022; Lunglei district a Thangpui Primary School a zirtirtu, naupang saruaka hawtira puh PC Lalbiakengi, SSA teacher chu vawiin khan suspend niin, suspend a nih chhungin hlawh a nei dawn lo.

August 29, 2022; Lunglei district a Thangpui Primary School a zirtirtu, zirlai naupang saruaka hawtira puh PC Lalbiakengi, SSA teacher chu vawiin khan suspend niin, suspend a nih chhungin hlawh a nei dawn lo.

ZALEN thudawn danin, PC Lalbiakengi hi Lunglei district jail ah tan tir a nih tawh avangin vawiin khan Sub Divisional Education Officer (SDEO), Lunglei South H. Sangthanga chuan a tanna hmunah kalchilhin, insawifiahna hun a pe a ni. Thangpui Primary School ah hian zirlai 23 leh zirtirtu 3 an awm mek.

Vawiin vek khan Education department chuan PC Lalbiakengi suspend order tichhuak nghalin, thu leh awm hma atan suspend a nih thu leh suspend a nih chhungin hlawh a nei dawn lo tih suspend order ah tarlan a ni.

Media hrang hranga tarlan tawh angin, Thangpui P/S zirtirtu PC Lalbiakengi chu a zirlai hmeichhe naupang pakhat saruakin sikul atangin a hawtir nia sawi a nih chungchangah Child Welfare Committee (CWC), Lunglei chuan August 27 khan an ko a, District Child Protection Unit (DCPU), Lunglei-in an zinga thawktu pakhat hmingin Lunglei Police Station-ah first information report (FIR) an thehlut bawk a, hemi vang hian police-in an man a, PC Lalbiakengi lakah hian Juvenile Justice (Care and Protection) Act Section 75 tlawhchhanin thubuai ziah luh a ni. 

Thudawn danin, Lunglei district jail a tang mek, PC Lalbiakengi thubuai hi bail theih a nih vangin, bail a a chhuah rin a ni.