Aizawl; Ruahmanna siam lawk tawh angin naktuk Thawhlehni atangin jail tang baila chhuah theih ang chi chu chhuah an ni tan dawn nia thudawn a ni a, hetih lai hian vawiin khan Central Jail, Aizawl-ah Ragt test neih niin mi 20 in covid 19 an vei tih hmuhchhuah a ni.

Thudawnnain a sawi danin vawiin (23.5.2020) khan Central Jail quarantine ward-ah Ragt hi tih niin mi 20 in an positive tih hmuhchhuah a ni a, enkawl turin hmalak zui a ni a, tang dang te pawh test hmanga enfiah tum an ni bawk a ni.

'High Power Committee to prevent the spread of COVID-19 in jails' in thu a lo tihtluk tawh angin naktuk Thawhlehni atang hian Central Jail leh District Jail zawng zawnga tang te bail-a chhuah theih chi te chu chhuah tir an ni tan dawn a, hei hian thubuai  tenau lam ni 1 atanga kum 7 thleng jail tang tur a hrem theih thubuai nei te bakah, thiam loh chang convict tawh zinga an tan hun hmang zo tep tawh, sawrkarin ngaihdamna 'remission' a pek theih te a huam ang a. Bail na tur an nei lo a nih pawhin personal bond a chhuah tir theih an ni ang.

Tualthat, pawngsual leh damdawi kaihhnawih thubuai lian nei te erawh a huam lo thung niin Mizoram State Legal Service Authority (MSLSA) a member secretary R. Vanlalena chuan ZALEN a hrilh bawk.