NGOCC-in FMR ngaihtuah

Aizawl : Ni 6.2.2024 khan NGO Coordination Committee ten MZP Office ah meeting an nei a, meeting hi NGOCC Chairman Lalhmachhuana (Central YMA President) in a kaihruai, meeting ah hian NGOCC a tel pawl hrang hrang - CYMA, MUP, MHIP, MZP leh MSU hruaitute an tel.

   Meeting ah hian India Sawrkarin India leh Myanmar inrina pin (Border fencing) a tum chungchang leh ramri hnaiha chengte inkalpawh theihna ‘Free Movement Regime (FMR)' thiah a tum chungchang ngaihtuah a ni.

   Union Home Ministry ah NGOCC hmingin Memorandum thehluh nise, Mizoram sawrkarah pawh lehkha thehluh ni bawk se an ti. Hemi bakah hian border fencing in a nghawng tur state dangte pawh a tul anga thawhpuia sawm nise an ti bawk. Heng bakah hian a tul huna hmalakna tur an ruahmanna nghal bawk.

Facebooker thlavang hauhin pungkhawm

Aizawl : February 6, 2024 khan Facebooker 'Tlangval U Hranga' invuah, Spa Jongte man tum danah dan palzut tumna awm nia hriain MNF thalaite Aizawl Police Station-ah an pungkhawm.

   Spa Jongte hi Medical Officer-in hriselna tha lo ‘unfit’ a tih hnuah thuneitu sang nawrna avangin endik tha leh tura tihna a awm nia an hriat avanga lungawi loin MNF thalaite hi an pungkhawm nia hriat a ni.

   MNF thalaite hi mi 100 chuang an pungkhawm a, damdawi ina an admit fel a nih hnuah a tin darh zui a, buaina lian zawk thleng a awm lo nia thudawn a ni.

Suggestion Box dah

Aizawl : February 5, 2024 khan CM Lalduhoma'n ni 100 chhunga an tihhlawhtlin tur a lo puan tawh angin, minister tin office ah complaint box leh suggestion box dah tawh a ni.

   Complaint box leh suggestion box hi minister tin office ten tha takin an dawngsawng/vil mek a, a tha thei ang berin heng box a complaint leh suggestion tla te chu bawhzui ngai a awm chuan bawhzuiin, action lakna tur ang chi pawh minister office tinte hian bawhzui zel an tum nia thudawn a ni.

   December ni 8, 2023 khan CM Duhoma chuan thuthar thehdarhtute kawmin, ni 100 chhung a an tihhlawhtlin tur a puang a, chung zingah chuan, Minister tin office ah complaint box leh suggestion box dah a nih tur thu hi a tel a ni.

Computing & Skilling Facility Center thar hawng

Aizawl : February 8, 2024 khan Chief Minister Pu Lalduhoma chuan IIT-Guwahati Electronic & ICT Academy Department te Computing & Skilling Facility Center thar a hawng.

   Chief Minister chuan, IIT Guwahati chu mithiam tak takte chherchhuahna hmun chhuanawm, National Institutional Ranking Framework tehnaa India rama zirna in tha pasarihna ni thei a ni a ti a, Electronic & ICT Academy Computing & Skilling Centre a hawng thei chu a ropui a tih thu a sawi a. Electronic & ICT department hian Mizoram-ah Information technology lam zirna course te, Lab Facility hawn an duh tih te a hriatin a phur hle tih a sawi.

AMC leh Taxation Department thawk dun dawn

Aizawl : Aizawl Municipal Corporation (AMC) hnuaia hna chi hrang hrang (works contract/supplies etc.) thawktuten chhiah an pek tur hrang hrangte awlsam zawka an pek theih nan AMC Building-ah Taxation Site Office siam tura hmalak a ni.

   February 8 khan Mayor Lalrinenga Sailo leh Taxation Department officer ten he Site Office tur atan hian ruahmanna siamin, a hmunhma turte an en ho nghal a ni.

   Taxation Site Office ah hian H. Lalramsanga, Assistant Commissioner of State Tax hovin State Tax Officer ten AMC hnuaia hnathawk, chhiah pe thei turte an lo pui thin ang a. Hei hian Goods and Services Tax (GST) leh Profession Tax a huam ang. Taxation Site Office hi ruahman lawkna ang chuan kar khatah ni hnih hawn thin a ni ang a, a tul dan a zirin ni hnih aia tam pawh hawn thin a ni ang.

LESDE Minister leh MSDE hotute inkawm

Aizawl : Mizoram LESDE Minister Lalnghinglova Hmar leh Ministry of Skill Development & Entrepreneurship (MSDE) enkawltu Minister of State Rajeev Chandrasekhar te chu February 8 khan New Delhi-ah an inkawm.

   Rajeev Chandrasekhar chuan Mizoram sawrkar tharin skill development lama hmalak a tum tak tak chu lawmawm a tih thu a sawi a. Thil kalphung pangngai pet pet ni lo, Mizoram mil project siama an thehluh chuan a hlawhtlin theih nan theihtawpin a lo pui thu a hrilh.

   Lalnghinglova Hmar chuan Chief Minister Lalduhoma hova 'hand holding policy' kalpui tura committee hranpa a din thu te, chumi kawng chuan MSDE chu nasa taka an behchhan tur thute a hrilh a; Rajeev Chandrasekhar chuan Mizoram hmachhawpte chu a ministry kal dan nen thil inmil a nih thu a sawi.

Sericulture hmalakna thar project pathum hawng

Aizawl : February 6, 2024 khan Chief Minister Lalduhoma chuan Silk Samagra-2 hmanga Mizorama Sericulture hmalakna thar project pathum a hawng.

   Rs. 624. 47 lakh senna tur Eri Project- Lai Autonomous District chhunga chhungkaw za thlan chhuah te nena kalpui tur, Rs. 588.36 lakh senna tur Mulberry Project- Chakma Autonomous District Council a chhungkaw za thlan chhuahte hmanga kalpui tur leh Rs. 1339.61 senna tur Muga Project, Mizoram pum huapa chhungkaw zanga thlan chhuah te nena kalpui tur chu Thenzawl Golf Course Auditorium ah a hawng. A hawnna inkhawmah hian Sericulture Minister Lalthansanga chu khualzahawm a ni.

   He hunah hian Pangang vulha eizawngtute, Central Silk Board members leh scientist te, NE states hrang hranga Sericulture Director leh officials pawimawh te, Serchhip district chanchinbumite an tel a ni.

Mizoram State Day hman dan tur rel

Aizawl : February 6, 2024 khan MINECO Secretariat Conference Hall-ah K. Lalthawmmawia, IAS, Commissioner & Secretary, Govt. of Mizoram, General Administration Department kaihhruaina-in Mizoram State Day hman dan tur rela thutkhawm a ni.

   Meeting-ah hian February Ni 20, State Day chu Vanapa Hall-ah chawhma Dar 11-ah hman nise tih a ni a. Khuallian atan Mizoram Governor Dr. Hari Babu Kambhampati chu beisei a ni.

   Meeting-ah hian State Day hmanna tur atana Tentative Programme siam niin mawhphurhna chanvo hrang hrangte inruat nghal a ni bawk.

Minister hovin Society hotute inhmukhawm

Aizawl : February 6, 2024 khan P.C. Vanlalruata, Cooperation Department changtu Minister chuan Registrar of Cooperative Societies (RCS) Office, Babutlang chu tlawhin, department official-te nen inkawmna hun an hmang.

   Cooperation Minister P.C. Vanlalruata chuan mipui tana pawimawhzia sawiin, department dangte nena tha taka thawkho tura hma lak a nih theih nan zirchianna kalpui mek a ni tiin, thawktute chu hma lam pan tura inbuatsaih turin a chah a. Sawrkarin cooperation a ngaihpawimawh thu leh Mizoramah Cooperative Movement a awm theih nan ngaihtuahna thar sen a tul thu sawiin, ramin hmasawnna a hmuh chhoh zel turah pawh a langsar ber department ni thei turin tan lak a tul a ni, a ti bawk.

Larsap leh MYC Chairman inkawm

Aizawl : February 7, 2024 khan Mizoram Larsap Dr Hari Babu Kambhampati-a'n a sawm angin Mizoram Youth Commission chairman Malsawmzuala Ralte chu Raj Bhavan-ah lengin an inkawm.

   Dr Hari Babu Kambhampati chuan, thla thara Andhra Pradesh leh Tamil Nadu inrina Sri City Special Economic Zone (SEZ) tlawha zin a tum thu leh Mizo thalaite tana thawh theih tur hna a awm a beisei tih sawiin, a hmunhma en a, hmalak theih dan zirchiang tura zin pui turin MYC chairman chu a sawm nghal a, Malsawmzuala Ralte pawhin kal ve ngei an tum dawn thu a sawi.

END Minister leh CKTP thukhawm

Aizawl : February 5, 2024 khan Excise & Narcotics Minister Lalnghinglova Hmar, Department hotute leh Central KTP hruaitute thukhawmin kumin February Ni 29 atanga March Ni 3 thlenga KTP General Conference Ngopa a neih turah zu leh ruihhlo do-na kawnga hmalak tlan dan tur sawiho a ni.

   Meeting-ah hian KTP chu member tam ber an nih angin thalai tam tak an fuankhawm dawn a. Chuvangin he General Conference hi thalaite, zu leh ruihhlo laka fihlim tur a infuihna hun a tan hman theih nise tih a ni a. Zu leh ruihhlo-in ram a run dan he conference a Member kalte'n an hriat theih nan a theih ang anga Programme hmanna-a thusawina-ah te zeh tel dan turah ngaihtuahna seng turin Excise hotute hian KTP hruaitute hnenah hian an ngen a ni.

   Meeting-ah hian zu leh ruihhlo dang avanga mitthi kan neih dan leh excise department hmalakna a ruihhlo an man dan statistics KTP hruaitute hnenah hian an hlan a ni.

Council of Ministers Meeting nei

Aizawl: February 5, 2024 khan Chief Minister Lalduhoma hovin Cabinet Room ah Council of Ministers Meeting neih a ni a. An thu ngaihtuahte zingah heng te hi a tel.

1. A proposal for the Mizoram Lokayukta (Amendment) Bill, 2024 - Vigilance

2. Payment of Dearness Allowance to Government employees only with the approval of the Council of Ministers - Finance

3. A proposal for the Mizoram Lokayukta (Amendment) Rules, 2024 - Vigilance

4. The Indian Stamp (Mizoram Amendment) Bill, 2024 - LR&S

5. Notification of Mizoram State Investment Policy, 2024 - P&PI

6. Operational Guidelines for Agricultural Market Assurance Fund (AMAF) - Agriculture

Kangmei ven hapta hawng

Aizawl : February 5, 2024 khan Synod Conference Hall-ah Chief Minister Lalduhoma chuan "Kangmei Ven Hapta, 2024" a hawng.

   Chief Minister chuan pi leh pute khan ram kang pawizia an hriat avangin Lo leh huan an hal dawnin tha takin Meilam an sial a, Meilu khaiin an hal chauh thin. Vanduai thila kangmei a chhuah palh pawhin a pachhuakin a thelh turin an bei vat a, rang takin an thelh leh thin. Thangthar fing zawka ngaihte hian kan ram hi an tikang nasa hle a, ramngaw venhim thuah pi leh pute an tluk ta lo niin a lang a ti.

Ramri chungchang CM pahnihin an sawi

Aizawl: Assam Chief Minister Himanta Biswa Sarma chuan February 9 kha a chenna inah Gauhati-a cham mek Mizoram Chief Minister Lalduhoma chu tukthuan a buatsaihsak a, ramri chungchang an sawi.

   Chief Minister pahnihte hian ramri chungchang an sawi dun a, chin fel tuma theihtawpa hmalak dun an rel. Assam state assembly thutkhawm lai a nih avangin an thutkhawm zawh hun remchang hmasaa ramri in-charge Minister Mizorama a rawn tirh tur thu Assam Chief Minister hian Mizoram Chief Minister hi a hrilh a. Ramri chungchanga state pahnihte kan inbiak chhung chuan a tu ve ve pawhin ramriah buaina siam loh ni se an ti bawk.