P.M.KISAN 
Ram chhunga loneituten an hnathawhna tur leh thil dang pawimawh atana an hman tur, kum khata cheng sang ruk, loneitu pakhatin an dawn ziah theihna tura sawrkar laipuiin a duan, Pradhan Mantri Kisan Samman Nidhi (PM-KISAN), chungchang sawi hona May 14, 2021 khan Prime Minister hovin Video Conference hmanga neih a ni a, Agriculture Minister C.Lalrinsanga chu he hun hmannah hian a tel

TANPUINA PE
May 14, 2021 khan Home Minister leh Hrangturzo bialtu MLA ni bawk  Lalchamliana chuan a mimal sum hmangin a bial chhung North Vanlaiphaia Covid-19 kai te, N. Vanlaiphai Community Covid Care Center (4C) te leh Bungtlang VLTF te hman tur Covid-19 dona hmanrua leh thilpek dangte a pe a. Dr. R. Lalthangliana, Health Minister pawhin N. Vanlaiphaia VLTF te chu thilpek a pe bawk.

BUHFAI SEM
Deputy Chief Minister Tawnluia, chuan May 14, 2021 khan a bial Tuichang Assembly Constituency chhunga Total Lockdown vanga hna thawk thei lo, chhuanchham mai thei dinhmuna ding chhungkaw 489 te tan buhfai a pek a, semchhuah nghal a ni.

CONTAINMENT ZONE HLIP
Siaha khawpuia Covid-19 positive hmuh chhuah, an kaina chin hriat lohte sulhnu chhui hna chu zawh fel a nih hnuah Chief Medical Officer, Siaha-in ulutuk taka an dinhmun a zir chianna atangin Contaiment Zone hlih mai a him lohna awma ahriat loh avangin, Shri. Kesavan R, IAS, Siaha District Magistrate chuan The Mizoram Epidemic Diseases (Covid-19) (First Amendment) Regulation, 2020 11(1)(b) tlawhchhanin Siaha khawpui Contaiment Zone-a puanna (vide Order of even No. dated 03.05.2021) chu vawiin May 13,2021 khan a hlip.

FLAM in CMRF pe
Covid-19 hrileng avanga puih ngai te puihna turin 13.5.2021 khan Former Legislators Association of Mizoram (FLAM) chuan Chief Minister's Relief Fund for COVID-19 ah Rs. 1,50,000/- an chhunglut.

BUHFAI DINHMUN THA
May 13, 2021 khan Supply Minister K. Lalrinliana hovin a pisaah Supply department officer-ten COVID – 19 hripui leng mek kara Mizoram mipuiten buhfai an chan tur ang pangngai taka an hmuh theih nana hmalak dan tur an sawiho. Minister chuan tun dinhmunah Mizoram tana Buhfai dinhmun a thak tawk thu a sawi.

ZANRIAH BUATSAIH
Sports Minister Pu Robert Romawia Royte chuan Mizoram pawn State danga Election duty a kal lo hawte zinga Covid hripui vanga Rengdil, Thenzawl, Khawzawl, Lunglei leh Serchhip Covid Care Centre leh Covid Quarantine Centre a awm mek, Police 200 dawn lai te tan an Commandant theuhte kal tlangin Aizawl, May 12, 2021 khan zanriah a buatsaih sak.

Chawl Lailawk
May ni 7-11, 2021 inkar khan VRDL, ZMC (Covid Laboratory) a thawk mi pathum chu Covid-19 positive an ni tih hriatchhuah an nih avangin VRDL chu khar lailawk a nih tur chu May 12, 2021 khan thuchhuah siam a ni. Hei vang hian May ni 12, 2021 khan RT-PCR hmanga sample test tih a ni lova, May ni 13 khan chhunzawm leh nghal a ni. 

INBIAKPAWHNA
Information & Communication Technology (ICT) Department Minister Robert Romawia Royte hovin May 11, 2021 khan Mizoram chhunga inbiakpawhna (mobile phone) leh Internet Service tha zawk neih theih dan tur Video Conference (VC) kaltlangin sawiho a ni.

Lalduhoma MLA atan lalut
May 11, 2021 chhun dar 12:00 khan Lalrinliana Sailo, Speaker, Mizoram Legislative Assembly chuan 26-Serchhip (ST) Assembly Constituency bye-election a thlan tlin, Lalduhoma chu rinawmna thu tiam tirin Member of Legislative Assembly (MLA) atan a lalut.

SEMINAR NEI
Sorkar laipui ruahmanna anga India Independence Day Vawi 75-na lawmna ‘Azaadi Ka Amrut Mahotsav India at 75’ hman mekah May 10, 2021 khan Art & Culture Department leh Higher & Technical Education Department-te buatsaih Online Seminar on First War of Independence 1857 chu ZOOM hmanga neih a ni a. He seminar hi Government Aizawl College-in a thleng (host) a ni.