Zawhna: Ka pu, pumpui ulcer ka nei a, ka pumah hian acid a tam khawp mai a, zanah phei chuan chaw ei te a har mai bakah ka thil ei apiang hi a thurah a chang ziah a, ka awm-ah hian min hnawh ve bawk thin. Pumpui leh thin damdawi chu ka ei tho a, engmah awmzia a nei chuang lo. Pum a acid tam lutuk hi engtia tih chi nge? Ka buai khawp mai, min puih theih chuan ka lawm khawp ang. Chhanna: Pumpui ulcer i neih hi endoscopy ah i enchiantir tawh em i sawi lo va, i la tihtir lo a nih chuan endoscopy chu lo ti ngei thei la a tha hle mai. Damdawi i ei chung pawha i ziaawm thei lo anih chuan natna chi khat Hyperchlorhydria i neite pawh ani thei ang. Kan pumpui acid insiam nan hian hormones chi khat “Gastrin” a awm a, he Gastrin hi i taksa ah a insiam nasa lutuk pawh ani thei. Ei leh in thenkhat acid insiam titamtute a awm a, chung zingah chuan thei thur lam chi te, thau leh mawm tam lutuk te, chawhmeh thak lutuk te hi a ni awm e.   Taksa leh emaw rilru hah nasat te hian pum acid hi a insiam nasa zual duh khawp mai a, zan men rei, chaw ei hunbi mumal lo, zuk leh hmuam tih nasat lutuk te hian acid a insiam tam duh viau bawk. A tihrehna atana pui thei che chu thlai hring ei tam te, mut that te, chaw ei hunbi mumal tak neih te a ni a. Zu leh zuk leh hmuam lam pawh insum hle a pawimawh ang. Endoscopy i tih theih chuan a result nen doctor lo inentir leh la, an puih theih che ka beisei.   Zawhna: Ka pu, kum 35 mi ka ni a, zu ka in thin a, ni 2 vel ka nghei hnu hian ka thak vak thin a, a hreawm thin khawp mai. Nghei ka tum pawn a thak avang hian ka in phah leh thin a, zu ka in hian a reh leh daih thin bawk si a. Min puih theih chuan ka lawm khawp ang.   Chhanna: Zu kan tih ber hi a chemical hming chu Ethyl Alcohol a ni a. Buh, atta, leh thei chi hrang hrang atanga an siam chhuah a ni ber a. A zu ngau ngau hi chu hua (allergic) an vang ang reng khawp a; amaherawhchu, a siamna ber zawk huat hi a awm thei a, chutiang avang chuan skin rash (vun lam insawiselna) hi a awm ve fo a ni. Zu kan in hian kan thin (liver) a enzyme pakhat Aldehyde Dehydrogenase (ALDH2) hian a lo thet darh a, Acetic acid ah a siam a, tichuan zunah leh thlante paih chhuah turin a lo thawn kual ta thin a. Mi thenkhat chu he enzyme nei chau bik hi an awm a, zu kha kan taksain a lo digest kim thei lo thin a, a bikin hmaiah te sen leh lum thur thur angte a rawn siam thei a ni.   Nangmah bikah chuan i zu nghei veleh vun insawiselna hi i neih thin avangin zu kaihhnawih lam aiin huat zawng eng emaw tak (skin allergen) i nei a ni thei ang. Thisen test a tha viau mai a, duhthusamah chuan skin doctor lo inentir thei la a tha hle. Zu hi in nasat chuan taksa tui tlachham (dehydration) a siam thei a, vun leh sam te a lo ro a, chu chuan vun thak a siam fo thin. Chutiangte pawh chu a ni thei a, i liver function te pawh check-tir tel thei la a tha hle. Zu nghei mai i harsat phei chuan tui in tam zual la, chu chuan i zun a siam tam ang a, i thatpui hlauh a rinawm bawk.