Lo neitute chuan Delhi daia Singhu, Tikri leh Ghazipur ramria farm law duh lohna an lantirna hmun atangin hnehna chang intiiin Punjab leh Haryana lam an pan ta.

Tar lan tawh thin angin lo neitute hian farm law pathum duh lohna lantirin thla 15 chhung zet Delhi daiah hian awmhmun an khuar a ni.

Sorkarin dan a hnuh kir bakah an thil phut dangte pawh tihhlawhtlinsak a tiam tak avangin Inrinni atang hian an awmna atana an siamchawp hmunte chu thiatin an chhuahsan ta a. An chhuahsan hma hian inkhawm tenau deuhte huaihawtin an haw hlawm a ni. 

Tractor-a an hawna tur kawngpuiah hian mi thenkhat chuan hnehna an chan lo lawmpui nan eng eng emaw nen an lo hmuak bawk.

Lo neitute hian hnehna kawng zawha mahni in lam pan hun atan hian Zirtawpni kha an ruat zet a; mahse, Tamil Nadu-a helicopter tlaah mi 13 zet thi zingah Chief of Defence Staff General Bipin Rawat a tel ve avangin amah zahna lantir nan a hun hi an sawn a ni.

Dan siam duh lohna lantirnaa an hruaitu langsar ber, Rakesh Tikait chuan a tam ber chuan Inrinniah an awm hmun an chhuahsan tur thu hi Zirtawpni khan news agency ANI hnenah a lo sawi tawh a. “Min puitute nen kan inkawm ang a, kan tawngtai ang a; tichuan, he hmun hi kan chhuahsan tan ang a, kan chhuah kim hun tur chu ni li ni nga vel lai a ni dawn a, kei pawh December 15-ah ka haw chauh vang,” a ti.

Kum khat chuang dan thar duh lohna an lantir hnuah Prime Minister Narendra Modi chuan November thla chawhnu lam khan farm law pathumte chu lo neitute duh ang ngeia an hnuhkir tur thu a puang a; mahse, thil dang phut an neih avangin lo neitute hian an awmhmun an chhuahsan duh lo.

Sorkar aiawhte nen indawr zui zelin Ningani khan lo neitu pawlte aiawh mi panga awmna, Samyukt Kisan Morcha-ah lehkha thawnin an thil phut hrang hrangte tihhlawhtlinsak a tiam tak avangin lo neitute hi haw turin an inruahman ta a ni.