ZALEN, Mar. 31, 2025: Mizorama thlanmual hmasa ber nia hriat, Venghlui Thlanmual thlahna hun chu Thawhtanni tuk khan Venghlui leh College Veng Branch YMA huaihawtin thlanmual thlah tak hmunah neih a ni.

Thlanmual thlahna inkhawm hi Venghlui Branch YMA President K.Lalchhuanmawia’n a kaihruai a, branch pahnih atangin report leh thusawi ngaihthlak ve ve a ni.

Chhinchhiah danin Venghlui Thlanmual thlah takah hian kum 1922 khan hnam dang (Gorkhali) inawk hlum chu phum a niin he lai hmuna phum hmasak ber a ni a. Sorkarin kum 1924-a thlanmual nei tura thuchhuah a siam hnuah Mizo zinga phum hmasak ber chu Thangsabuti niin kum 1926 khan phum a ni thung.

Tun dinhmunah thlanmual chhuahsan takah hian mi 1,601 phum an ni tawh a, heng zinga 1,006 hi mipa niin hmeichhia 595 an awm bawk a. Mitthi zinga 63% hi mipa niin hmeichhia 37% an ni.

Thlanlung inziak chhiar theih zinga upa ber chu kum 1932 a thi a ni.

Venghlui leh College Veng hian Mualpui ram, World Bank Road bulah thlanmual hi an nei ve ve a. Inphum thuah leh hlamzuih tih loh chu April, 2025 atangin thlanmual tharah hian phum tawh tur an ni.