Aizawl August 12, 2024 : Vawiin khan ZPM chuan Party Office-ah chhung inkhawm hun an hmang a, thusawitu Home Minister K.Sapdanga chuan, “Ration Card, Assam ramri leh Airport chungchangahte thu belhchian dawl lo hmanga eptuten mipui rilru hruaipen tuma an tithlabar fo hi a pawi takzet a, mipuite nuihzat leh rin loh an hlawh phah zual thei,” a ti.

K.Sapdanga chuan Ration Card chungchang sawiin, “Eptu party-ten ration card chungchanga mipui thu an fah dan hi a dik tawk lova, chhungkaw khawsak ziaawm zawk Ration Card var hmangtuten sawrkar atanga buhfai Subsidy-a an leina man tihsannaah hian chhungkaw harsa zawkte Ration Card Eng (yellow) leh Ration Card Pawl (Blue) hmangtute a huam lo tih kan hriat a tha. Tunah hian Supply Minister hmalaknain Ration Card siam that hna kalpui mek a ni a, chhungkaw khawsak harsa zawkte tan phurrit tur a awm lo,” a ti.

Ramri leh Airport chungchang sawiin, “Tunhnai khan Assam lamin an duty camp bul leimin an thianfai a, hei hi eptu party lamin mipui tihthlabarin nan hmangin thu an vawrh darh leh vak mai a, hetianga thu belhchian dawl lo hmanga mipui rilru an kuai peng thin hi a pawi ka ti hle."

"Tunhnai khan Assam Sorkar nen pawh ramri chungchangah tha takin meeting kan nei a, hmasawnna kan hmu chho mek a ni. Tin, Airport chungchangah pawh Mizoram tana tha tur zirchianna neih anih chauh laiin, eptu party lam chuan thutlukna siamfel ta ang maiin thuthang dik lo an lo vawrh darh leh chiam mai hi a pawi ka ti hle a ni,” a ti.

Home Minister K.Sapdanga chuan, “Sawrkar tha nei tur chuan Opposition party tha tak neih a ngai a, Zoram mipuiten Eptu Party tha tak min pe hi lawmawm hlein ka hria a, sawrkar leh mipui tan malsawmna ropui tak an ni thei a ni. Chutih laiin Opposition Party-te pawhin sawrkar tihbuai tum nan thubelhchian dawl lo an hmang fo a, hei erawh mipui nuihzat leh rin loh hlawh theihna a ni,”a ti.