March 6, 2024; KTP General Conference a zo a, sawi zui leh ngaithlak zui hlawh, Upa Lalnunpuia Hrahsel thuchham phuah chhamtu Kelkang nula Christina Lalnunfeli Fanai in a inbuatsaih dan leh a thuchhamin a nun a thu a sawi dan te ZALEN a hrilh.   

ZALEN zawhna chhangin Christina Lalnunfeli Fanai chuan, KTP General Conference a a thuchham sawi chu, kumin January thla laihawl vel khan a phuahtu Upa Lalnunpuia Hrahsel hnen atangin a dawng tih a sawi a, hemi atang hian a theih ang angin a inbuatsaih nghal niin a sawi.

"Ka zir dawn a piangin bible ka chhiar loh paw'n tawngtaina nen ka inhlan hmasa ziah thin, Kelkang bethel tlangah chhoin tawngtaina nen ka zir thin bawk a, in lam a ka zir bakah, biak in ah tawngtaina nei chungin ka zir nasa hle," a ti bawk.

"Ka thuchham thu khan ka nun a khawih hle a, min pek hlim a ka chhiar pawhin ka hnuk a ulh hial," ti bawkin, "A phuahtu ka ngaisang zual a, a chungah lawmthu sawisen loh ka ba, min thawn hlimah tawngtaina nen min hlan a, min fuih bawk a, ka sawi hma ni pawhin phone kaltlangin min tawngtai sak," tiin a phuahtu Upa Lalnunpuia Hrahsel chungchang a sawi.

Central KTP lam atangin Kelkang bial hi items (recitation) nei tura ruat an ni a, an bial KTP lamin chanvo nei tur an inzawng hmu thei mai lo, a tawp ah Christina Lalnunfeli Fanai kut-ah a tla a, a naupan lai sunday school inkhawmpui a recitation a lo sawi ve tawh thin bak, tun hnua sawi zui ngai tawh lo a ni.

Tawngtaina nen a chanvo tihlawhtling ngei turin a inbuatsaih a, a KTP member pui ten tawngtaina nen an pui a, an kohhran in nilaizan, inrinni zan leh zing tawngtai inkhawmah te theihtawpin an tawngtaipui thin bawk. Chung zawng zawngah chuan lawmthu a sawi.

Chung mai chu a la ni lo, khawmpui hmang tur a Ngopa an pan dawnin khawmpui kal tur zawng zawngten bethel tlangah chhoh puiin an tawngtaipui a, khawmpuina hmun Ngopa a a chanvo a tihhlawhtlin ni ah pawh Bethel tlang-ah an khaw mipuite'n an lo tawngtaipui reng bawk.