Aizawl May 31, 2024 : Vawiin khan Mizo Hnam Run chhung inkhawm neih a ni a. Hun hnihnaah MNF Gen. Hqrs. Gen. Secretary Er. R. Rohmingliana, MLA chuan thusawiin SASCI sum lapse chungchang ZPM chu debate-ah an cho thu leh Leader of Opposition motor kawl chungchang te a sawi.

Thorang bialtu MLA chuan, "Thudik hrula thu belhchian dawllo hmanga mipui rilru hruaipen an tum fo hi ZPM te hian sim rawh se. SASCI sum lapse chungchanga ZPM ten MNF legislature party te public debate puia min chona hi kan ngam thuin kan chhanglet a. Kan chhanletna lehkha hi social media vela thehdarh ve lovin, keimah ngeiin ka pe a ni. Hemi chungchang hi special assembly ngeia sawiho nise tiin kan rawt a. Tawnzau eng ha boxer ten, tawnzau pawl ha boxer te inhnek puia min sawmna hi kan pawm thlap a, boxing ring neitute an nih anga ring lo buatsaih tura kan rawtna chu a takin an ti hlawhtling ngam ta lo a ni. Social media lama debate ngamlo anga min sawi hi thubelhchian dawllo a ni," a ti.

SASCI sum lapse chungchanga Er. Rohminga, MLA chuan assembly house-a a zawhna leh a thusawite enlet theih vek a la ni, a ti a. Sum lapse hi a ui lutuk a, sawi fo pawh hi a duh tawh lo thu leh a hlauh ang ngei ngeiin a lapse ta chu uiawm a tih thu a sawi.

Er. Rohminga chuan, "Nimin lama PR ka chhiar pakhatah tunlai khuarel chhiatna thleng chungchangah party pakhat chuan hamthatna lak nana hman an tum niin a lang a. Mi chhiattawhna kara hamthatna lak lo tum hi a zialo takzet. MNF chuan hetiang hi kan ti ve ngailo ang. Zoram tan enge ka tih anga, enge hmachhawp ka neih ang, tih hi kan ngaihtuah zawk tur a ni a, party dang chhiat avanga dinchhuah tum mai lovin, keimahni hi kan in enfiah fo tur a ni," a ti.

MNF General secretary chuan, "Leader of opposition (cabinet minister rank) in car hlui tawh tak a dawng a, reilote hnuah an in pawh a thleng zolo. A hnua car pek leh anih pawh workshop ah a awm mek. Heng thute hi sawichhuah kher tul kan ti lo a. Leader of opposition hi kan neihlohna a rei tawh avangin sawrkar lai thiltih hmaih leh fel tawk lo te sawilan kher tul kan ti lova, inchirhtheh pawh tul kan ti lemlo. Amaherawhchu, leader of opposition in car thar manto sawrkarin a lei sak tih thuthang a awm tak avangin sawichhuah ve a ngai ta a ni. Speaker in nuai 30 dawnlai man car a leithar zawk a ni," a ti.