August 10, 2022; Tukin khawvar hma atanga Zokhawthar ep, Tiau Khawmawi khua a Burma sipaite leh tualchhung sipai an tih maite inbeihna ah civil Zohnahthlak mi 2 leh Burma sipai 5 an thi nia hriat a ni a, hliam tuar engemawzah an awm bawk. He inbeihna thleng vang hian Tiau Khawmawi mite chu Zokhawthar lamah an rawn thlanchhe deuh vek tawh nia thudawn a ni.

ZALEN thudawn danin, nizan zanlai pelh hnu deuh dar 1 chho vel atang khan tualchhung sipai tia hriat, People Defence Force (PDF) leh Zoland tangkawp nia hriatte leh Tiau Khawmawi a inkulh, Burma sipaite chu drawn hmangte leh bomb hmangte in an inbei a, Burma sipai lam hian Laipui pawh an hmang nia hriat a ni. Burma sipaite hian Tiau Khawmawi leh Rih ah te sipai camp an nei nia thudawn a ni.

He an inbeihna ah hian hriat theih chinah Tiau Khawmawi mi, Zohnahthlak mi 2 thiin, PDF mi 1 leh civil mi 2 in  hliam an tuar a, Tahan lam report a alan danin, Burma sipai lam pawh mi 5 an thi a, hliam tuar engemawzah an awm.

Tukin khawvar hnu leh vawiin chawhma lam thleng khan Burma lam Burma sipaite chu indo thlawhna (Jet fighter) hmangin Tiau Khawmawi chungah a la thawkkual a, bomb thlak erawh  an nei lo nia hriat a ni. Hetihlai hian Tiau atanga hla lutuk lo, Kawilam khaw mi, ram kal inzui mi engemawzahte chu thlawhna atangin bomb leh silai a beih an ni a, vanneihthlak takin thi leh hliam an awm lo nia hriat a ni.

He inbeihna vang hian Tiau Khawmawi khua chu he thu ziahlai thleng hian rauhsan a ni deuh vek tawh a, a tam zawk chu Zokhawtharah an lut nia thudawn a ni.