Aizawl; Nimin zing khawvar tirh vel khan Tiau leihlawn bul, Tiau Khawmawi ah Burma sipai leh Chin National Democratic Force (CNDF) nia hriatte an inkap a, CNDF mi 2 kahhliam an nih bakah midang pahnih Burma sipai ten an man nia thudawn a ni. Hetihlai hian nimin thleng khan Zokhawthar ah raltlan 6,000 chuang an awm tawh.

Zokhawthar atanga ZALEN thudawn danin, inkahna hi nimin zing dar 5 bawr vel atangin a intan a, darkar khat tlinglo deuh an inkap a, Burma sipai lamah hliam tuar an awm hriat a ni lo. CNDF mi hliam tuar pahnihte chu Mizoram lamah enkawl an ni a, an dinhmun a ngaihtuahawm loh nia hriat a ni. Tiau Khawmawi khawchhungah inkahna a hmalamin a lo awm awm tawh thin a, nimin zinga Tiau lei bula inkahna erawh a vawikhatna thlenna a ni.

Tiau lei (Burma lam) ah Burma police duty an awm tawh loh avangin CNDF ten an luah tih Zokhawthar atanga thudawnna chuan sawiin, chu chu nimin zing vartian khan Burma sipai lam hian an rawn hup ta nia rin a ni. Burma sipaiten an man pakhat chu Tiau Khawmawi mi niin, inkahna thlen zawhah Burma sipai lam an insaseng a, he thu ziahlai thleng hi chuan boruak duhawmlo thleng zui a awm hriat a ni rih lo. 

Hetihlai hian tun dinhmunah Zokhawthar ah raltlan 6,000 chuang an awm mek a, Tiau Khawmawi mi chhungkua 1,200 bawr vel te chu Zokhawthar ah an raltlan deuh vek rih a, New Haimual pawh rauhsan niin, Haiheng ah In 6 an la awm a, a bak chu Zokhawthar lamah an raltlan vek rih bawk.