Kum tluanin hah thikulin hna an thawk a, Mizoram chu tlangram a nih angin tlangramah lo an nei thin a; mahse, an hnathawh phu tawk erawh an thar chhuak ngai lo thung. Hriat phak chinah Mizo chhungkaw eizawnna ber tlangram lo neih chu tunlai mi thiamte chuan a hlawk lohzia loneitute bulah an sawi fo a, a thlakna tur zawng turin an fuiha, kawng an kawhhmuh zel. Horticulture deparment-a thawktute chuan tlangram lo neih aia hlawk zawk tur thalaite pawn an sit loh tur eizawnna atana hman tlak tur ngaihtuahin mi hausa zawkte chauhin an neih tur nia ngaih thin Green House chu kut hnathawktute hnenah subsidy-in kum hnih khat kalta atang khan an pe chho tan a, kumin chhung hian green house (pre fabricated) 433 an sem chhuak tawh a ni. Horticulture deparment hotute chuan, greenhouse pakhat (sq.m. 100)-ah mumal taka thlai chin a nih chuan kum khatah cheng nuai khat atanga nuai hnih inkar a lak luh theih thu an sawi a. Tlangram lo neiha tin thum/li hmuna zau lo neih a hah taka hnathawh aiin tha sen a tlem zawk a, sum lakluh pawh a tam zawk theih thu Zalen an hrilh. Pa hmei tan chuan tlangram lo neih chu a hau takin a huphurh awm em em a, green house erawh pa hmei tan pawh lawm rawih kher ngai loin kum khat ei khawp leina sum a thar chhuah theih hial a ni. Horticulture department hotute chuan green house hnuaia thlai chinte chu ruahtui tam lutuk leh hrik lakah harsatna an tawh ve ngai loh thu an sawi a, ‘ruahpui van awn sur lai leh thal ni sa chang ver vawr hnuaiah pawh hna a thawh theih reng avangin tha leh hun kal ral a tlem bik a ni’ tiin Zalen an hrilh. Green House dahna tur chuan tuihna tha tawk tak a awm a ngai a, kumtluanin thlai chi hrang hrang a chin zel theih a, leitha a pek theih reng avangin a thar hlâwk bik a ni. Greenhouse (pre-fabricated) hi a dung meter 20 leh a vâng meter 5 a ni a, a pum pui zau zawng chu sq.m. 100 a ni a, pakhat hi Rs. 86,500 man a nih laiin kut hnathawktute hnenah 10% tum tirin (subsidy) Rs. 8,650-in department chuan an khultir thin thung a ni. Horticulture department hotute chuan, thalai lehkhathiam, thei leh thlai chìn lama tui, kut hnathawh hreh lote zawn chhuah a, eizawnna bul tansak an tum tih Zalen an hrilh a.Thei leh thlai enkawl kawnga tui leh eizawng duh thalaite chu Horticulture department-ah inhriattir turin an ngen a; theihtawp an chhuahpui dawn thu a sawi a ni.