Delhi Priya cinema hall bula McDonalds dawhkan kila Coke leh arbawp han keih hmawrh hmawrh chu changkanna teh nan Delhi thalaite'n an hmang miau a, Hmarchhak mite pawhin helai hmun hi an hmaih mawh viau, hnamdang 'vai' te nen an leng zaa, inkawp lawp lawp te pawh an awm ta ve ang; fast food culture in a hrinchhuah pakhat a ni. Junk-food kan tih ho Subway,KFC, McDonalds leh Dominos te'n Hmarchhak an rawn thlen chhoh meuh chuan khawvel pangperah hmun an khuar kim viau tawh. Kum 50 a tlin meuh chuan 'culture' pakhat, nghet tak a piang tih hi sawi nawn a ngai lo. Tunlaiin hun awl a tlem tial tial a, heng siamtute hian 'hmin rang, to lo' tih chu hnamdang thalaiah an tuh te te a, vunngo ngaisang hnam tan chuan an tihdan apiang ngaihsana changkanna emaw tih a awl ta ve ang. A nihna takah chuan a 'soda-tui-dahvawh-thlum-chawp' hi a tui bikna a awm em em loa, a hrisello bawk; arbawp tel chhuanso a thlak hmin pawh chutiang chu ni mahse 'tunlai lo' nih duh bik hek lo! Hetia 'a mawm mawm' ‘a tui tui'- junk food khaidiat a pun zel lai hian mithiamte chuan zir chiangin hriselna a tihchhiat dan an tlangzarh ve zela, America ah khuan kum 15 hnuai 56% zet chu an rih tur aia rit satliah mai ni lo, a let thawka rit an ni mek ni, a mak lem lo kan ramah naupang an thau tual tual. Junkfood hralh a kal zel dawn chuan duhthlan tur ei tur hrisel company lamin a siam tel a ngai a,' 99% fat free, Zero cholesterol' tih te an dawrah an tar fur ngam tawh. Thlai chauh ei tan pawh duhthlan tur an hlui ta zel a nih hi. Tunlai thalaite khawvel hi kum 40 chunglam tan chuan hriatthiam a har khawp, 'zan men rei hriin a man' kan tih rual hian zan hna thawh a tul avanga meng rei tho tlai tam tak chu an ni. A chhan chu eng pawh nise zan riltam ei tur zawng ringawt hi 'market' tling tham an ni a, sumdawng chuan a umzui lo thei lo. Chutih rualin khawtlangin zan rei thawm an ngaithei tlat si loa, dar 11 PM bak phal loh an intih hmuh mek bawk, darkar 1 in pawh sei nise zan sumdawng te chu an kang zawt phah ang! Eng pawh nise hemi boruak vir vel behchhan hian Aizawl khawpui thalai tam tak rilruah 'hriselna ti chhe thei ei loh leh ei tur thianghlim ei,' tih hi dawrkai zan lam inhawng rei te ZALEN palai in a kawmkualna atangin a lang ruak a, a man lam ai mahin 'thau leh thlum awmlo/ tlem' a nih chuan an lei ngam zu nia. Dawrpuia nepnawi dawrlian zan inhawng rei neitu leh nghaktu ni bawk chuan, ‘ Min dawrtu zinga a 50% vel chuan an en ber chu ' a hrisel em?' tih a ni a. 'Mak ka tih deuh chu thalai zingah han ei mai pawha natna nei lo leh insum ngai lo te hian thau leh thlum tamna an lei mang lo, eng eng nge tel? tih an chiana an lei mai a, manto leh to lo lamin kawngro a su vak lo," tiin Dawrpui Veng chhunga nep nawi dawr lian neitu chuan ZALEN a hrilh. Nepnawi zuar liantham zan lama inhawng rei dawr 6 te zawhna inang pek an ni a, chhan dan a inang tlangpui. Tuna a nihphungah chuan thalaiin zan lamah an lei a, kum upa zawk te chuan khaw en lai an chuh ve thung. ' Hnamdang min dawr thin te leh Mizo in an lohna chu 'a man' a ni, vai te chuan thil hrisel pawh nise a man to tham deuh ah chuan nupa an inrawn a, rei tak an sawi hnuah an lei emaw a dang emaw an lei chauh," tiin a sawi a. Ngaihmawh zawng sawiin nu leh pa te chuan an fa naupang ei turah an inseng hnem ngam a, chumi a nih rau rau chuan a tui ringawt en lo in hriselna lam ngaihtuah pui se, chu chu kan tlakchham niin ka hria a ti bawk. He dawr hian nitin mi 400-500 dawrtu a nei bawk. Aizawl chhim lam nepnawi dawr inhawng rei nghaktu nu pawh in,' keini ah chuan kum upa insum ngai tawh te'n 'thau leh thlum awmlohna an lei a, thalai ah chuan a dang hlek a, category 2 in ka then a, 50% aia tamin ei tur hrisel an duh a, a bak chuan tui tih zawng an lei,' a ti mauh mai. Nu leh pa te zirtir nilo in ‘media atanga an hmuh nghawng’ tih loh chu puh tur a hriat loh thu a sawi a, Korean serial nghawng chhuah ni hialin a ngai bawk. Nu leh pa tam zawkin an fate eitur an leisak a, hriselna lam ei tur an dappui lem lo a, a tui tui an leisak nia a hmuh thu a sawi bawk a. A ni thlir danah chuan amah dawrtu tam zawk chu customer nghet a ni a, 'Titi naah an Veng ka zawt thin a, a ni vek kher lo thei a, mahse Veng awmnaa zirin ei tur hrisel emaw a tui tui an leiin an lei lo,' tiin ZALEN palai a hrilh. Khawpui hmar lama dawr neitu 50% aia tamin an ei tur an uluk niin a ngai a, a bikin thalai te'n ei tur an ti kher kher chu a tirah chuan mak a tih thu a sawi a, "A tuina siamchawp ni lo, natural flavour kan tih ang hi kan kawl ngai lo a, an lam zin em avangin kan zuar lo thei lo a ni," tiin mak a tih thu a sawi zing hle. Suangtuahna a kal thui duh hle, tunlai thalai khawvel hi hrethiam tur chuan a zira zir tak meuh a ngai a, hna pek thu hlaah pawh ngaihtuahna sen nawn a ngai a, heng Generation’ Y’ ho ngaihtuahna hi policy siam lawihna tham a ni. An rilru puthmang hi sawrkar, kohhran, thalai pawl leh nu leh pa te'n hriatthiam pui tum a va tul ve!!!.