Hun laihawl (medieval period) laia Italian khawpui, Bologna-a sak, Pisa-a mi ang bawka ding awn chu tun lai hian a awn zual a, a tluk mai hlauhthawnna a lian hle.

Thuneitute chuan kum zabi 12-na laia din, Garisenda Tower hi a tluk palh pawha mi dang tana harsatna a thlen tam loh nan a kungna metre 5 (ft 16)-a sang an siam tawh.

Metre 47 (ft 154)-a sang tower hi degree liin a awn a, a nih dan pangngai lovin tun hnaiah a hawi dan a thlak deuh.

Khawpui rorel khawl chuan an dinhmun chu ‘a khirh hle’ tih an sawi.

Garisenda Tower hi Bologna khawpuia in sang bik pahnih zinga mi a ni a. Pakhat zawk, Asinelli Tower hi amah aia a let vel zeta sang niin a awn ve tho bawk a, khualzinte lawn theih tura hawn a ni bawk.

Kum 1109 leh 1119 inkara sak kha an ni a, Garisenda zawk hi kum zabi 14-na laia a awn tan avangin a hniam phah hret a. Dante-a poem lar tak, kum 1321-a a phuah zawh, The Divine Comedy-ah pawh ziah lan a ni.

October khan Garisenda awn dan chu a dik lo tih hmuh chhuah a nih avangin khar tan a ni a, a lungphuma an hman hmanruaten rawih lam an pan a ni tih hmuh chhuah a ni.

City Council chuan tower hi chhan hram tumin hma an la a, ‘hna hmasaah a him theihna tur ngaihtuah a ni’ an ti.

An hungna hi tluk palha a tla darh tur ven nan bakah hian a bul hnaia in leh khawsate himna tur atan an ti bawk a. Thira siam net an zar tel bawk.

A hungna siam hna hi nakum kum tirah an siam zawh hman an inbeisei a; mahse, a tower hi chei that a ngaih dawn avangin kum tam tak khar erawh a nih a rinawm.

A hungna ringawt pawh hi € maktaduai 4.3 man tur a ni a, a chei that nan mipuiin an sum thawh theihna tur an siam bawk.

An hna hi a hautak dawn tak zet tih an sawi a, ‘khawpui pum bakah Bologna leh a chhunga awm ngainatute inpekna a ngai a ni’ tiin an sawi.