Tokyo khawpuia vantlang inkalpawhna rela chuang pakhatin a chuanpuite chem hmanga a beihnaah mi 10 zet an inhliam.

Zirtawpni zana thil thlenga a titua puh hi kum 36 mi a ni a. Police-te hnenah hmeichhe pakhat hlim tak a hum chuan a thinrim a, thah a duh ta niin a insawi tih tual chhung chanchinbute chuan an tar lang hlawm.

Hliam tuar zinga pakhat, zirlai hmeichhia chu a dinhmun a tha vak lo va, mi dangte erawh na lutuk an awm lo.

Japan-ah hian venhimna a khauh a, hetianga tharum thawha mi beihna ang chi hi a tam lo hle a. Tokyo khawpui phei chu Olympics Games an thlen mek avangin venhimna a khauh zual hle.

Chema mi beitu hian rela chuangte hi Seijogakuen station bulah, zan dar 8:40 (India-a tlai dar 4:10) vela thleng a ni.

Rel hi a khalhtuin a hnung lama thil thleng thawm a hriat veleh emergency-in a tidin g nghal.
Chhuitute chuan rel a din veleh hian tharum thawhtu hi rel kawngah zuang chhuakin a tlanchhia a. Train crew-te chuan passenger dangte hi relkawngah hian hruaiin a bul hnaia station an thlenpui.

Rela chuang ve pakhat chuan NHK news hnenah pindan pakhat atangin a awmna pindanah mi eng emaw zat an rawn tlanchhe lut thut niin a sawi.

A titu hi a tlanchhiat hnuah hian dawr pakhatah lutin thawktute hnenah chanchinthara pawikhawihna thlenga an puan titu chu a nih thu hrilhin a tlanchhiat mek thu a sawi bawk.

Tokyo Metropolitan Police chuan Inrinni zing khan mipa pakhat an man a, a chanchin kimchang erawh an sawi lo.

Hliam tuar zinga pakua hi damdawi inah lak an ni a, pakhat erawh thil thlenna hmun atang hian amahin a insaseng.

Japan hi ram him ber pawl ni mah se tun hnaiah tuna mi ang chia chema mi beihna hi a thleng zeuh zeuh.

Kum 2019 khan mi pakhatin Kawasaki-a bus nghal sikul naupang a bei chiam a, mi pahnih thiin mi 18 vel an hliam.