Khawvela infiamna kut pui lian ber an tih thin Tokyo Olympic 2020 chu tun kar zirtawpni July ni 23 tlai dar 4:30 hian a khuhhawnna (Opening ceremon) an tan tawh dawn a, he hunah hian ram hrang hrang sing chuang an pung khawm dawn a, India atang pawhin infiammi 228 zet feh chhuak-in event 85-ah an inlan dawn a ni. 

Tun hma lam pawhin Olympic Games hi khawvel huapa infiamna kut pui lian leh ngaihhlut hlawh ber a ni a. Kum li danah Summer Olympic Games leh Winter Olympic Games hi neih thin a ni. 

Olympic Games hi Greece ram atanga intan niin Olympia tih a ni thin. 776 BC atanga bul tanin kum li danah neih thin tho a ni a, 6th century bawr thleng khan kalpui a ni. Modern Olympic an tih mai chu kum 1896 khan Athens, Greece hmunah bul tan that leh a ni a, Ram hrang hrang atanga infiammi pung khawm ten an ram aiawhin in elna an kalpui a ni. 

Hun a kal zel a, Olympic chuan ngaihven leh ngaihhlut a hlawh chho ta zel. Hun hmasa lamah chuan hmeichhia te tel ve phalsak an ni ngai lova a, tunah erawh infiamna lama hmeichhe ropui tak tak kan hmu thei ta. Khawvel mipui ngaihhlut ber Summer Olympic bakah hian vur rama tih thin Winter Games leh pianphunga rual banlo pualin Paralympic Games a awm bawk. Tun hnai deuh khan kum 20 hnuailam tan Youth Olympic Games siam thar a ni leh bawk. 

Olympic hi Indopui I leh II vangin kum 1916, 1940 leh 1944 ah te neih theih a ni lova, hei bak hi chu tluang taka kalin nikum khan Covid-19 hripui leng vangin thulh a ni leh a, nikuma neih tawh tura ruahman chu kuminah hrileng karah buatsaih luih a ni dawn ta a ni. 

Modern Olympics hi Baron Pierre de Coubertin-a duan chhuah niin International Olympic Committee (IOC) chuan a thleng tur ram leh intihsiakna tur hrang hrang pawh an buaipui nghal thin a ni. 

Infiamna hmanga ram hrang hrang inelna a nih vangin ngaihhlut a hlawh hle a, in el a nih rualin ram hrang hrang te inkungkaihna tha siamtu pawimawh tak pawh a ni tel. Olympic flag leh torch bakah opening leh closing ceremony te hian ngaih hlut a hlawh hle a ni. Infiamnaa pakhatna atanga pathumna te podium-ah lawnin gold, silver leh bronze medal te an awrh thin a, hnam pasal tha anga chhal an ni.

Olympic Movement    

Olympic Movement hnuaiah hian national leh international sporting organization leh federation an awm nual a, a khaikhawmtu ber International Olympic Association (IOC) headquarters hi Lausanne-ah a awm a ni.  

Olympic Movement hi element pathumin an siam a chungte chu:
International Federations (IFs) governing body hi international level niin infiamna khawvela pawl lian tak tak te nen an thawk ho a, entir nan football lamah International Federation of Association Football (FIFA) te, volleyball lamah Fédération Internationale de Volleyball (FIVB) te nen an thawk ho a ni. Olympic Movement hnuaiah hian International Federations (IFs) 35 an awm a, chung te chu  Olympic sport-ah telh vek thin an ni. National Olympic Committees (NOCs) hi Olympic Movement-ah chuan a pawimawh hle a, ram awiawh leh pawimawh buaipuitu an ni. Entir nan, Indian Olympic Committee (IOC) hi India rama NOC chu a ni. Tunah hian IOC pawmpui NOC ram 205 an awm mek. 

Olympic games pual hian Organizing Committee din chawp thin a ni a, he pawl erawh hi chu games nei dawna din chawp thin niin games neih zawhah IOC lama final report an thehluh hnuah thiah leh mai thin a ni. 

Olympic Movement-ah hian French leh English tawng te chu official language a pawm niin a  thlengtu ram tawng chu hman phal a ni bawk thin. 

Olympic flag
    Olympic logo, Olympic ring an tih mai thin rawng chi hrang hrang bial in zawmkhawm hian continent hrang hrang panga (America, Africa, Asia, Australia, Europe) te inlungrualna a entira, a rawng pawl, eng, dum, hring leh sen te hi puan varah nem kaiin Olympic flag-ah hman a ni. Kum 1914 khan flag hi duanchhuah tawh nimahse, Summer Olympics, Antwerp, Belgium a neih  kum 1920 khan pho lan chauh a ni thung. Olympic motto hi Latin tawnga Citius, Altius, Fortius tih niin "Faster, Higher, Stronger" tihna a ni.    

Modern Olympic tan tirh khan ram 14 atangin event 42-ah mipa 250 pawh thinglovin inelna an hmachhawn thin. Olympic neih hnuhnun ber 2016 kha chuan event hrang hrang 306 awm tawhin infiammi (competitor) 11,238 (6,179 mipa, 5,059 hmeichhia) te inelna an hmachhawn. Summer Olympic hi ram hrang hrang sawmpakuaah neih nitawhin continent panga-in an thleng kim tawh a ni.