United States-a Texas state chuan tornado tuara mi pathum an thih hnu lawkah kartawpah hian khaw lum uchuak tak an hmabak leh nghal mek.

US chhim lamte thlipui leh ruahin nuaia Florida leh Mississippi-ah thi hial an awm hnu lawk, Ningani atang khan khua hi a lum leh tan.

Zirtawpni tlai thleng khan chhim lamah hian power nei lo chhungkaw 4,00,000 vel an la awm.

Thuneitute chuan khaw lum tak hian mi tam takin air conditioner an hman tam dawn avangin power pek a tibuai thei dawn tih an sawi bawk.

Thawhtannia ram pum chawlh, Juneteenth hmang tura an inbuatsaih mek laiin khaw lum uchuak tak hi an tuar mek.

National Weather Service (NWS) chuan Pathianni thleng a lum dawn tih an sawi a, Texas-ah chuan 43°C lai a ni thei tih an sawi.

Texas-a khawpui eng emaw zat chuan mi hrisel lo zual tan cooling centre an siam.

NWS hian kartawpah hian khaw lum ber record ding lai khum hial a nih a rinawm thu an sawi.

US-ah hian nipui hi official takin June 21-ah a intan thin a, hemi hma chawlhkar khatah a lum tan nghal hle tihna a ni.

TORNADO-IN chhiatna thlen

Tornado an tawrh avangah hian Texas-a Perryton khuaah chuan mobile home a chhemah mi pakhat a thi a, khaw chuanhnuai lamah mi pahnih an thi bawk.

Mihring 8,000 vel chenna, Perryton khuaah hian mobile home 30 vel chu tornado hian na takin a nuai a, tihchhiat a ngah hle niin an khuaa fire chief chuan a sawi.

Mi 10 vel dinhmun tha lo taka awmin damdawi inah lak an ni a, power a awm loh bawk si avangin generator nen pakhat chu an zai niin a sawi a ni.

Florida-ah pawh state hmar lama Pensacola-ah thing tluin a chenna in a delh avangin hmeichhe pakhat a thi.

Mississippi-ah pawh mipa pakhat, Georgia-a a unaupa vuinaa kal tuma garage-a a insiam lai chu thingin delhin a thi ve bawk.

Tornado avang hian Texas-ah chuan Zirtawpni tlai thleng khan chhungkaw 1,74,000 chuangin electric an la nei lo niin Poweroutage.us website chuan a tar lang.

Louisiana-ah chhungkaw 1,52,000 vel, Mississippi-ah 1,07,000 leh Florida-ah 25,000 velin an nei lo bawk.

Alabama-a Eufaula mayor chuan Ningani khan tornado hian an khuaa mel li bial a nuai a, in chhem thluin thingkung 40 vel a chhem thlu bawk tih a sawi.

Georgia-ah pawh in chimin mi pahnih an him hman chiah chiah niin an khaw sheriff chuan a sawi.