Aizawl: Gandhi piancham denchhena Tourism Department in Mizoram Cycling Association nen a tangkawpa an buatsaih Tour de Hmuifang Cycling Competition chu tukin zing khan Mualpui Zero Point atanga tlan tan niin TC Pachhunga, Vice Chairman, Tourism, Sports & ICT Development chuan a vailiam a, Sihfa rider Mesak Vanlalvena chu thleng hmasaber a ni.

Tour de Hmuifang ah hian District hrang hrang, Aizawl, Lunglei, Kolasib, Champhai, Serchhip leh Saitual atangin Rider 72 an tel a. Vailiam hmaa thu a sawinaah TC Pachhunga chuan Tourism Department in Cycling Competition a buatsaih hi COVID19 avanga tourism sector a thih mai loh nan leh tourism promote nana buatsaih a nih thu a sawi.

Tour de Hmuifang hi Category pahnih, kum 35 hnuai leh kum 35 chunglam category tana siam a ni a. Category I (Below 35 years) result chu hetiang hi a ni. 

1.Mesak Vanlalvena, Sihfa khua, tuna Zemabawk a awm, BSc , PUC atanga zo tawh a nia. Nikuma a ma record 2:20 hours chu khumin darkar 2:14 chhungin a thleng. 

2.Malsawmkima kum 20, Chhippir, darkar 2:23 ah a thleng

3.Lalruatfela kum 17, Bawngkawn, darkar 2:25 ah a thleng.

Category II (Above 35 years) result chu hetiang hi a ni. 
1.Lallawmsanga,Mission Veng, darkar 2:35 ah a thleng

2.David Rualzakhuma,Saron Veng, darkar 2:42 ah a thleng

3.R Lalhmachhuana, Champhai, darkar 2:47 ah a thleng

Competition ah hian Dr Malsawmkima, kum 52 chu rider zing a upa ber a ni a. Lalramluahpuia Zote kum 12 chu a naupang ber a ni. 

Tourism Minister Pu Robert Romawia Royte chuan Tour de Hmuifang hi kum tin a neih tum a nih tur thu alo puang tawh a ni.