ZALEN April 21, 2025 : Toyota Kirloskar Motor (TKM) Private Limited te chuan vawiin khan Road Safety & Disaster Management lama hman atana Mizoram sawrkar hnena JCB pahnih an pek chu Chief Minister Lalduhoma hnenah an hlan. Automatic number plate reader 34 chu CM hi an hlan nghal bawk.

Chief Minister Office tuala JCB pahnih chabi inhlanna an neih zawhah Conference Hall-ah hian programme hman a ni a. Chief Minister hian, "Disaster management lama hman theih hmanraw to tham, tangkai bawk si kan neih belh hi kan lawm a, a tangkai hle dawn a ni. Toyota Kirloskar Company-in Aizawl Traffic Management tihchangtlunna tura an thilpek te, Chapchar Kut senso tam tham tak an thawh te leh Mizoram tana an luan chhuahna dangte pawh ka lo hria a, an chungah kan lawm em em a ni," a ti.

Aizawl SP Stephen Lalrinawma leh Smart City Limited CEO CC Lalchhuangkima te chuanToyota Kirloskar Motors Smart City Limited ten Aizawl Traffic Management tihchangtlunna tura CSR hmanga hmanrua an pek, Integrated Control & Command Centre hmalakna kaltlanga kalpui mek a nih dan an sawi bawk.

TKM (Toyota Kirloskar Motors) te hian February 17-21, 2025 khan CSR kaltlang tho-in vaivakawm YMA Auditorium ah Commercial vehicle driver mi 800 te health clinic an lo neih sak tawh. Tunah hian ITI, Aizawl-ah Toyota Technical Education Program (T-Tep) kal pui mek a ni bawk a, heta zirchhuak a ti tha te hian Toyota hmunpui Japan thleng a thawh theihna remchang an nei thei dawn a ni.

Vikram Gulati, Executive Vice President and Country Head pawhin thu sawiin, "Mizoramin leilung chhiatna a tawh thin thu te kan hre thin a. Tih theih tam tak nei lo mah ila, heng chhiatna a lo thlen palh changa chhanchhuahna leh tanpuina hnathawhna lama hman tur, an tha tichaktu tura kan rin JCB hi sawrkar pek tha kan ti a. Lawm takin kan hlan a ni," a ti a.

CSR kaltlanga JCB pahnih an pekte hi kawlzui tur Aizawl leh Serchhip district-a District Disaster Management Authority (DDMA) Chairman, district Bawrhsap te kutah hlan nghal a ni.