24.06.2023:  North America Manipur Tribal Association leh pawl dangte'n an huaihawt "Tribal Solidarity Against Ethnic Cleansing in Manipur" programme chu 3:30 PM (ET), June 22, 2023 khan US Capitol Ground, Washington DC ah PM Narendra Modi-an US Capitol chhunga thu a sawi laiin pawn lamah Manipura Tribal-te chunga thil thleng hriat rengna hun Vigil (zan ven) an hmang a. US tlawha zin Prime Minister Narendra Modi hnena memorandum an siam chu an tlangzarh/thehlut bawk.

"Vigil ah hian thusawina hun kan hmang a, mitthi te sunna hun kan hmang bawk a, nunna chan hming an hriat theih zawng zawng chhiar chhuahna hun hman a ni a. June ni 24, 2 PM (ET) White House kawt leh Indian Embassy bulah Rally huaihawt tum a ni bawk," tiin B.Thanseia, Executive Committee Member, MSA, Maryland Branch atanga he huna tel ve chuan ZALEN a hrilh a ni.

NAMTA memorandum thehluh-ah chuan Manipur ah President's Rule puan phut a ni a, nitin mamawh leh venhimna pawh tribal leh tribal ni lo tan inang renga pe turin an phut bawk a ni. Remna a awm theih nan Justice Committee din phutin hetah hian Manipura civil society leh neutral third party mi nawlpuiin an pawm theih tur dah an phut bawk a. Kuki-Zomi hnam tan Constitution of India in a sawi angin inrelbawlna hran neih an phut bawk.