Tripura Chief Minister Biplab Kumar Deb-a thah tuma an chet avangin mi pathum man an nih thu police chuan Inrinni khan an puang.

Heng mite hi Ningani tlai khan chief minister chenna, Shyamaprasad Mukerjee Lane-a a tlai leng (evening walk) chu car hmang a bul hnaiah tlanin beih an tum niin news agency Press Trust of India hnenah an sawi.

“Deb-a hi kawng sirah a zuang sawn a, lirthei hian chak takin a tlan pel a, amah vengtu pakhat erawhin hliam tenau a tuar,” an ti.

“Chief minister vengtute hian car hi umzui mah se an man hman ta lo,” an ti bawk.

Chhui zui nghalin Ningani zan khan Kerchowmuhani vengah mi pathum leh an lirthei hi an man a. Tualthah tumna thubuai siamsak an ni.

Chief Judicial Magistrate PP Paul-a court-ah Zirtawpni khan hruai nghal an ni a, ni 14 chhung kawl zui phalsak an ni.

Assistant Public Prosecutor Bidyut Sutradhar chuan mi pathumte hi kum 20 chung lam vek an nih thu a sawi a, an chanchin kimchang erawh a sawi lo.

“Ni thum chhung police thu zawh fiahna hun kan dil a; mahse, court hian judicial custody-a August 19 thleng awm a phal a. Police hian chief minister beih an tum chhan hi an zawt mek a ni,” tiin Sutradhar chuan PTI a hrilh bawk.