ZALEN April 4, 2025 : Lunglei khawpui thu an tuilaknaah tui a tlem avangin an buai a, PHE in mipui duhkhawp sem tur an nei lo a, tui kang nghakin tuikhur-ah mi tam tak an intlar a, sawrkar atangin hmalakna a la awm rih lo niin sawi a ni. Vawiin khan PHE hotute chuan an dinhmun chanchinthar lakhawmtute hnenah an sawi.

PHE Deptt Lunglei hotute chuan SE Er. Zohmingliana Office chamber-ah thuthar lakhawmtu te kawmin SE chuan April 4, 2023 khan Lunglei khawpui tuilakna hi a kang tawh a, khami tum khan tui pump thinna thlang lawka mi chu tui pump naah pump lutin chuta tang chuan mipui pek an ni a, ruah a rawn sur a an ziaawm leh thei a, April 28, 2024-ah khan a kang leh a, hemi tumah pawh hian an mangan hnu lawkah ruah a rawn sur leh a, an ziaawm leh hram a ni a ti. Kumin a tui kang erawh kumdang aiin a nasa a, ruah a sur mai loh chuan a manganthlak tiin a sawi.

Tui dahkhawlna hrim hrim chu hmun hrang hrangah an nei tha tawk tih PHE SE chuan a sawi a, Power supply a tha in Tui pump na khawl an nei tha tawk a, a pump tur ber Tui a awm miau loh avangin tihngaihna a awm ta rih lo a ni a ti. "Tunah hian Tlawng luiah Concrete Gravity Dam siam mek a ni tih sawiin a hnathawktu Contractor chuan zawh hun tur a tihah a zawh hman loh avangin thla 6 dang atan pawhsei sak a ni a, pangngai taka hna hi zawh anih chuan nakum lamah chuan tun ang em em a harsatna hi a thlen a rinawm tawh lo," a ti.

Lunglei-a tui harsatna ber pakhat, a kaikuang chu Gravity Dam August 31, 2024-a khuah zawh tura ngaih zawh hman loh chu a ni thei nia an ngaih thu Media te chuan an sawi ve bawk.

Er Mawitea, EE LWSM chuan Lunglei khawpui chhungah tuikhur 90a awm mek tih sawiin a thianghlim em tih enfiah zel a ni a, a tam zawk chu thinghlimlo anih vangin Laboratory-ah test mek a ni tih sawiin tuikhur tui, rawngbawl nana ringte chuan chhuangso hram se a duh tih a sawi.

Dr ZR. Thasangsuala EE Rural Div. pawhin tui a harsat avang hian tui lakna hnar, Tlawng lei chhak lamah chuan tumah insu lo turin ngenna a siam a, ram tih chereu nasat avanga tui hna hi kangchat a nih ve bawk avangin mamawh tih tlem a ngai a ni a ti.

Tun a tui pump-na, Lunglei Greater Water Supply Scheme Phase-I hi kum 1995 a khatihlai a CM Pu Lal Thanhawla hawn kha niin “Highest Single Stage Pumping System in India” tih a ni a, mipui 66,000 chawm thei tur a ngaih a ni. Tunah erawh a let aia tam mipui an awm tawh a, Tui Connection hi 16,012 a awm mek a, consumer te hnenah tui sem chhuak vek tur hian thla khat vel hun a ngai a ni.