Ruah sur nasa tak leh tui lianin a tihbuai mek, Tamil Nadu-a Chennai khawpui leh a chhehvelah chuan tlemin ruah a ziaawm tan dawn niin an sawi.

Hetih lai hian Inrinni tlai thleng khan Kanniyakumari leh Tirunelveli district velah chuan ruah hi la sur turin Regional Meteorological Centre, Chennai chuan a sawi a. India Meteorological Department (IMD) chuan Chennai bik chu inralrinna dar khawn a titawp thung.

Kerala leh Andhra Pradesh vaukam lamah erawh la sur deuh turin a sawi lawk.

MeT department chuan cyclonic system thar chu Andaman sea hmar lamah Inrinni leh Pathianni hian a insiam mek tih a sawi a. IMD-a scientist senior RK Jenamani chuan a insiam danglam zel dan an ngaihven reng tih a sawi.

Inrinni chawhnu thleng khan Tamil Nadu-ah hian Kanyakumari, Vellore, Ranipet, Tirupattur, Dharmapuri, Tiruvannamalai, Kallakurichi, Namakkal, Karur, Dindigul, Salem, Nilgiris, Coimbatore, Theni, Perambalur, Tiruchirapalli, Madurai, Virudhunagar leh Thenkasi district-ah chuan ruah a la sur nasa hle a. A bak Tamil Nadu hmun dang leh Puducherry leh Karaikal velah tam vak lo a sur zui leh bawk.
    Kar hmasa lam a\ang tawha ruah tam tak sur avang hian Tamil Nadu-ah hian mi 14 an thi tawh a. ANI news agency chuan hmun tam tak chu tuiin a chim a, mahni ina tang, che sawn thei lo an tam hle niin a tar lang.
    Power an nei lo va, tui pawh ruah nena inpawlh bak an neih loh avangin an khawsak a buai hle.
    Chennai-ah hian inkalpawhna pawh a buaithlak hle bawk.