ZALEN April 14, 2025 : G.I.G. Motors & NEXA Aizawl bultumin April 16, 2025 (Nilaini) hian Tuirial Airfield-ah 'JK Tyre powered Indian Racing Fest – a carnival of Total Control' chu hman a ni dawn a, he hunah hian Indian driver leh rider tha ten an lirthei ke, JK Tyre kutchhuaka thuam hmangin an thiam thil te an entir dawn a ni.

Vawiina Royale Lalawi Hotel-a media an kawmnaah, JK Tyre Motorsport Head-Operations Hari Singh chuan show an neih turah an car rawn thawhchhuahpui tur hi motor tha bik Lexus leh BMW te an ni a ti a, India car zingah chuan 'Maruti Suzuki Baleno' a tel thu a sawi. Bike-ah hian Suzuki GSX 750cc, Kawasaki Ninja 1000cc leh Honda CBR 650cc an hmang dawn a ti a. Showstoppers tur chu 'Rotax Racing Gokarts' khalh tur kum 9 leh 10 mi 'karting sensations' te an nih tur thu a sawi.

He hun hi Tuirial Airfield-ah tlai lam Dar 3:00 atangin show hi neih tan tum a ni a, Stunt Car, Drift Car, F4 Racing, Rotex Racing Gokart Car leh Super Bikes-a India driver leh rider tha ten an thiam thil hmangin hmuhnawm an entir dawn a ni.

Aizawl-a he hun a thlen theh nan hian Lushai HOG, PETRONAS, BR Studio, LBS KIA te chuan an tha leh tul tur te an thawh bawk a ni.

 'JK Tyre powered Indian Racing Fest – a carnival of Total Control' hi April 12, 2025 khan Nagaland-ah neih a lo ni tawh a, Aizawl-ah April 16 hian neih a nih hnuah April 19, 2023 hian Meghalaya-ah neih a ni ang a, April 20-ah Guawahati-ah neih leh tur niin Sikkim-ah April 22 hian neih leh a ni ang.