Hong Kong International Airport-a thuneitute chuan electric wheelchair thutna dupa thuhruk cocaine ni ngeia rin kg 11 zet an man.

An thil man hi $ maktaduai 1.5 man zet ni tura ngaih niin mipa kum 51 mi hnen atangin Inrinni khan an man a ni.

Amah hi Caribbean-a ram pakhat, Sint Maarten atanga Paris a tlawh hnua Inrinnia Hong Kong lut kha niin an man nghal bawk.

Ruihhlo hlauhawm tak tawlhtu a nih avangin thiam loh a chan chuan dam chhung lung in tang tura hrem theih a ni.

Customs thuneitute chuan an mansak pa hian a wheelchair hi bungrua chi hnih a neiha pakhat zawk a nih thu an sawi.

Tumhmuna an endiknaah hian thawktuten an rinhlelh deuh avangin an ennawn tha leh a, hetah hian a thutna dup leh a nghenchhan tuamtu chu a tira thuina ang ni lovin thui that leh a ni tih an hmu ta a ni.

A kengtu hi Hong Kong mi a ni lo va , car rental company-a director niin a wheelchair hi a thianpain a hmantir niin a sawi.

Thuneitute hian an chhui mek zel.

Customs thuneitute hian ram dang atanga ruihhlo lak luh tihtawp a nih theih nan he thil an hmuh chhuah hnuah hian ‘hmun rinhlelhawm zual’ atanga lutte chu an endik uluk zual tih an sawi nghal.

An chhinchhiahna hnuhnung berah chuan customs hian kum 2022 chhung khan ruihhlo hlauhawm zual man chhuah tum 931 an nei a, a hmakumah 906 niin a pung hret a. Nikum chhung khan heng thil kaihhnawihah hian mi 178 vel an man bawk.

Tun tum hi thlawhna tumhmunah wheelchair-a thuhruk ruihhlo man vawi khatna a ni lo va. November thla khan New York-ah hmeichhe wheelchair kea thuhruk cocaien $4,50,000 man man chhuah a lo ni tawh.

September, 2022 khan Italian khawpui pakhat, Milan-a tumhmunah khawl hmang wheelchair-ah $ maktaduai 1.6 man dawn cocaine man a ni tawh bawk.