23, June, 2023: Tunhnaia Mizoram State Animal Welfare Board in  The Mizoram Animal Slaughter (Amendment) Act a taka kalpui relin uisa zawrh tihrem nana ui talh leh a sa zuar thinte laka complaint thehlut tura a rel chungchangah Aizawl Uisa Zuar Association chu thutkhawm an tum nia thudawn a ni.

June 21-a  Mizoram State Animal Welfare Board (MSAWB) chuan an Chairman Er. Lalrinawma, AH & Vety Minister hova thukhawm chuan  AH&Vety Call Center Helpline No 1962-chu ran leh ramsa tihduhdah tuar an awm a, mipuiten thuneitute hnena an report zung zung theih nan zawm ve nise an ti a. 

Uisa zuartu zing ami pakhat chuan, uisa zawrh chu an eizawnna a nih avang leh sawrkar-ah pawh phalna nei thlapa zuar an ni thu sawiin Mizo tam takin uisa chu an ei vangin chuti ngawtin Dan siamthat ang diak diaka kal theih a nih a rin loh thu a sawi a. Mizo tam takin uisa an ei avangin MSAWB te'n an tum ang ti lui ta se, uisa a van chuan thil tam tak a buai thei a, bakah 'demand' a awm si chuan an pawl ami ni kher lo pawhin a ruka an zawrh duh mai a rin thu a sawi bawk.

Uisa zuar pakhat chuan an ran talhte chu na hre tlem thei ang bera an talh thin thu leh member te pawh an inzirtir thin niin  a sawi a. "Hma kan sawn ve tawh viauin kan in hria a, thenkhat chuan a phurhna hrante pawh an nei tawh a, awmze neiin kan kal ve tawh viau asin," tiin a sawi bawk a ni.