DOWNLOAD OUR APP

Read latest news on your phone
app-store

Ukraine hnena tanpuina pe hnem ber US, $tld 25 a pe tawh

Sep 16, 2022

Kumin February 24 atang khan Russia chuan Ukraine a run a, tun thlengin beihpui a la thlak chhunzawm zel. Ram hrang hragin Ukraine tan ralthuam leh tanpuina sum an thawn lut a, US chu Ukraine tana tanpuina pe hnem ber niin US Dollar tluklehdingawn 25 ($tld 25) zet a pe tawh. 

Kumin February 24 atang khan Russia chuan Ukraine a run a, tun thlengin beihpui a la thlak chhunzawm zel. Ram hrang hragin Ukraine tan ralthuam leh tanpuina sum an thawn lut a, US chu Ukraine tana tanpuina pe hnem ber niin US Dollar tluklehdingawn 25 ($tld 25) zet a pe tawh. 

Europe ram hrang hrangte chuan Ukraine hnenah hian ralthuam leh tanpuina sum an pelut ruih ruih a, hei vang hian Russia chuan Europe ramte hi gas leh oil-ah a hrek mek. Europe bakah hian North America atangin Ukraine hian tanpuina a dawng nasa hle a, US leh Canada te chuan ralthuam leh sum leh paiah nasa takin an pui mek a ni. US hian Ukraine tan hian $tld 25 zet a seng tawh a, a la pek belh mek zel bawk - Canada pawhin $tld 0.34 a thehchhuak ve tawh bawk.  

UK chu Ukraine tana tanpuina pechhuak tam pahnihna a ni a, $tld 4.03 a pe chhuak ve tawh. Hetihrual hian US-in tanpuina a pek zat nen erawh a la inthlau vai vai hle. Poland chuan $tld 1.8 a pe tawh bawk - Germany $tld 1.2, Czech Republic $tld 0.27, Denmark $tld 0.27, Latvia $tld 0.25, Estonia $tld 0.25 leh Australia $tld 0.25 te chu a pe chhuak hnem zual an ni. 

Ram dang tanpuina zarah hian Ukraine chuan Russia hi a dolet mek a, an ram an hloh tawhte pawh an la let leh mek a ni. Tun hnai khan Ukraine President Volodymyr Zelensky chuan September thla tir atang khan Russia-in a awp an ram 6,000 sq km zet chu an ram sipai ten an la let tawh tih a sawi a, ram an lakletna hmun hi a tlawh nghe nghe a ni. 

Thawhlehni khan German chancellor Olaf Scholz chuan Russian President Vladimir Putin chu phone-in a bia a, Russia President hian Ukraine a run chu a tisual lo tih a lo hrilh. Minute 90 chhung an inbia a, Olaf Scholz chuan Russian President Vladimir Putin hi a sipaite hnuk kir turin a ngen a ni. Mahse a ngenna hi a zawm dawn lo a nih hmel hle a, Ukraine an run chu a inchhir loh thu a sawi chhuak. 

Share now