Russia-in February 24, 2022-a Ukraine a run tan atangin ni 500 a tling ta a, hetih chhung hian naupang 500 vel nen civil mi 9,000 chuang an thi ta niin United Nations chuan a sawi a, civil mite tawrhna hi a dem tak zet tih a sawi bawk.

UN hnuaia Human Rights Monitoring Mission in Ukraine (HRMMU) chuan Zirtawpni khan thuchhuah siamin ‘civil miten an tuar nasa hle a ni’ tiin a sawi a. Thi zat hi a tak takah phei chuan a tam hle a rinawm tih an sawi.

“Ukraine-a civil mite tawrhna rapthlak tak chuan mellung a thleng leh ta a ni,” tiin HRMMU-a deputy head Noel Calhoun chuan a sawi.

Kumin bikah thi zat chawhrual hi nikum aiin a hniam niin an  sawi a, hetih rual hian May leh June velah a sang leh tih an sawi bawk.

June 27 khan Ukraine khawchhak lam, Kramatorsk chu missile-a kah niin naupang pali telin civil mi 13 an thi.

Indona hmun tak tak lai atanga hla tak, khawthlang lama Lviv khawpuiah pawh Ningani zing hma takah khan missile hmang bawka beihna thlengin mi 10 an thi a, mi dang 37-in hliam an tuar a. An mayor chuan indona a chhuah tan atanga an khawpuiin beihna a tawh nat ber niin a sawi.

UN chuan he beihna hi World Heritage Convention-in a hum lai hmun beihna hmasa ber a nih thu leh in hlun tak tak pawh a chhiat thu a sawi bawk.

THIHNA TAMNA Ukraine Indo

Ukraine-a UN monitoring mission chuan tun hnai ni 500 chhunga Ukraine khawchhak lama thi hi a hma kum riat chhung, Russian-te thlawp inlak hran duh pawlten Crimea an thunun avanga buaina chhuaka thi aiin an tam daih zawk niin a sawi.

Russia hian Ukraine hi thlawhna atangin a bomb reng a, laipui leh missile-in a kap reng bawk a, hengte hi civil mite thih chhan ber pawh a ni a. Civil mite hmun pawimawh leh an châk lakna a tichhia a, hei hian power leh tui lakna pawh a nghawng nasa hle.

Khawchhak lama Bucha leh Mariupol khawpui phei chu nikum khan Russian-te hian an bei nasa hle a, thlalak darhah phei chuan insuatna rapthlak tak a thleng anga ngaih theih niin khawvel pawh a barakhaih hle a, war crime leh insuat mang tumna thleng anga sawi a ni.

Zirtawpni khan US chuan Ukrainian sipaite hi cluster munition an tih ang chi pek a tum thu a puang a, hei hi mihring dikna chanvo humhalhtute chuan ngai an ti lo hle a, civil mite thihna thlen tamtu ni mai turah an ngai a ni.

Cluster bomb an tih hi bomb puak chhawng ang chi a ni ber a, a va tlakna mai bakah huam zau takah a puang chhawng thei a, hei tak hi civil mite tawrhna thlen theitu a ni a. Hei mai bakah hian puak nghal mai lo tam tak a awm thei a, hei hi indo reh hnuah pawh puak leh thei a ni a, tawrhna a thlen thuah thei a ni.