Ukrainian President Volodymyr Zelensky chuan Russian sipaite chu inpe (surrender) mai turin a ti.

Thawhtanni zana TV-a thu a sawiah Russian sipaite chu an inhloh nasa hle a, Chechnya buaina aia tam an inchân tawh niin a sawi.

Tunah chuan indona hmangin eng thil mah an nawr hlawhtling dawn chuang lo tih an inhre thiam tan tawh niin a sawi bawk.

“Dam chhuah in duh tih ka hria,” a ti a. Inpete chu hmelma ang ni lovin, ‘mi pangngai angin’ an en zawk dawn thu a sawi bawk.

Anmahni rûntu Russian-te chungchang sawiin Zelensky chuan, “In titihona kan lo hre ru a, ngaihtuahna fim hmang lova indona awm mek te, khawngaihna nei lova inchet dan leh in ram chungchanga inngaihdan te pawh kan lo hria a ni,” a ti.

Ukrainian mipuite hmingin inpe mai zawk turin a ngen tih a sawi.

“Kan sipaite kuta in inpe a nih phawt chuan mi pangngai kan lo dawnsawn dang ang bawkin kan lo dawngsawng ang che u. In sipai in inenkawl dan ang ang ni lovin, kan mite intih dan ang lo takin kan enkawl ang che u. Duhthlang rawh u!” a ti.

Zelensky-a hian Russian sorkar TV-in chanchinthar a puan laia indo a duh lohzia tilanga tibuaitu, Marina Ovsyannikova-i zahna leh a huaisenna a fakawm thu a sawi bawk.

Russian pawh ni sela, tu pawh thu dik danchaha awm kaltlangtir tura beitu leh thu dik lo vawrh dah thin tihtawp tumtute chu chawimawi an phu tih a sawi.

Russia-in Ukraine a rûn mekah hian remna zawngin ram pahnih palaite chu indawr zui zel tura ngaih an ni a. Zelensky-a chuan ‘thil tha lam chhe tê’ a awm tan niin a sawi.

Palai hna thawk turin Thawhlehni hian Polish, Czech leh Slovenian prime minister theuhte chuan Kyiv hi an tlawh dawn a, Zelensky-a pawh an kawm ang.

Polish sorkar chuan an ram hruaituin a tlawh tur hi European Union-in Ukraine-in ram hrang  a neihna leh mahni kea ding a nih a thlawpzia lantirna pakhat a nih thu thuchhuah siamin a tar lang.