Russia-in an ram a run a, sipai nisa lem lo Ukraine mi tam tak chu thih huamin an ram sipai te tanpui turin ral do turin an inpe. Hetia hmelma bei tura inpe zingah hian mi hriat hlawh leh lar tam tak an tel. An ram hum tuma thih huama beitute beihna chu hmun him atangin en liam mai tum lo ram leh hnam hmangaihtu an chhuak thar zel bawk. Chung zingah chuan Ukraine striker hlui kum 1986-a Ballon d'Or chawimawina dawng ngat tawh Igor Belanov pawh telin hmelma kap turin silai a awrh chhuak ve ta. 
   

Belanov hian Dynamo Kiev tan title pariat a la hman a, German club Borussia Moenchengladbach leh Eintracht Braunschweig tan pawh kum 1980 leh 1990 chho vel khan a khel thin. 
   

Tunah chuan kum 61 laia upa a ni ve tawh chungin a ram leh hnam mamawhna leh kohna aw ri chu ngawih bo san mai tum lovin a chhang ta zawk a ni. Ani hma hian infiamna lama mi lar Oleh Blokhin, kum 1975-a Ballon d'Or award dawng tawh leh heavyweight champion lai boxer rothap Oleksandr Usyk te pawhin Ukraine sipai hi an lo zawm ve tawh bawk. 
   

Ukraine FA president Andriy Pavelko-a'n Belanov-a te khua Odessa a rawn tlawh tumin raldo tura a inpe thu hi Ukraine forward hlui hian a lo sawi a ni. Belanov hian 1986 kuma a Ballon d'Or award dawn chu hospital-ah hliam tuar te en theih turin a pho chhuak nghe nghe. 
   

Belanov hi Odessa-ah piangin a professional career hi an khaw club SKA Odessa leh Chornomorets Odessa te atangin a tan a, Soviet Union tan tum 33 khel hmanin kum 5 a khelh chhungin goal 8 a khung a ni. A hnuah Dynamo Kiev tan khelin European Cup final-ah Atletico Madrid chu si thum faia hnehin a champion pui a, hemi kum hian Ballon d'Or a dawn phah. 2018 khan Ukraine FA, board of strategic development-ah a tel ve a, Ukrainian football legend lar ber pakhat a ni.