United Nations High Commissioner for Human Rights chuan Zirtawpni khan Myanmar rama thelh hleihtheih lova buaina a awm chhunzawm zel chu a ngaimawh thu leh sipaiten ralthuam hlauhawm tak tak an hman chhunzawm zel vangin a dem thu a sawi.

Buaina-in reh lam a pan theihna turin rorelna chelh mektute nawrna atan palai hna zau zawka thawh a duh thu a tar lang.

Michelle Bachelet-i chuan April thlaa Association of Southeast Asian Nations (ASEAN)-in hmalakna tur kawng nga an duante zinga buaina tihreh leh eptu lamte nena inrawn khawmna neihte chu sipaite hian an ngaihsak lo hle niin a sawi.

April thlaa Myanmar-in tlawh a dilna an lo hnawlsak tawh, Bachelet-i hian Kayah state-a thupuan awmah civil mite chu inphenna atan hman an ni a, chenna in leh biak inte bomb hmanga beih a ni a, mi 1,08,000 chuangin an in leh lo an tlanchhiatsan a. Chaw an tlakchham bakah tui leh faina chungchangah harsatna an tawk mek a, heti chung hian an rama tanpuina lut tur danchah mek an nih thu a tar lang.

Tunah hian Southeast Asia ramten buaina kara palai hna an thawh mekah hmasawnna hmuh tur mang a la awm lo va. ASEAN foreign minister-te, China, Japan leh ram thenkhat chuan kar liam ta chhung khan remna leh muanna a awm theihna tura ruahmanna awmsate chu bawhzui thuai turin an nawr ve bawk.

UN, khawthlang lam ramte leh China chuan tunah hian ASEAN hmalaknate an thlawp vek a; mahse, Myanmar sipai, Tatmadaw an tihte chuan an ngai pawimawh lo hle thung a. Inthlan thatna tura ruahmanna kawng panga an siamte chu a tha tawk tiin an sawi.

Bachelet-i chuan palai hna thawh vat a nih theihna turin an ram awn lam ramte chu hmala turin a ngen a. Politics lama inhnamhnawih zawng zawngte chuan inremna atana inbiakna neih ho an mamawh a, sipai eptu lam sorkar dinte pawh tel ngei se tiin a sawi.

Myanmar rama buaina chhuak hi a mawhphurtu ber chu sipai hotute an ni a, an thil tihsual man an hmu ngei tur a ni a ti bawk.

Tuna civil miten sipai doletna atana pawl an indin mek People's Defence Force-te leh hnam sipaite chu civil miten an tawrh lohna tura fimkhur turin a chah.