MYANMAR Buaina bul - Myanmar-ah hian February 1 khan sipaite chuan mipui sorkar paih thlain hruaitu thahnem tak an hreng nghal.

Kum 75 mi, Suu Kyi pawh a chenna inah hren nghal a ni a. Thubuai khirh tak tak paruk an siamsak a, court-a a inlan zeuh bak hmuh tur a vâng zui hle.

Sipaite hian November thlaa an inthlanah dik lo tam tak a awm avanga hetianga che hi an nih thu an insawi a; a hranpaa chhuitute chuan inthlan hi a dikin a zalen tawk hle niin an sawi ve thung a. Suu Kyi-a an paih thla leh mana thubuai an siamsak chu politics atanga hnawh bo an tumna mai niin an puh.
Sorkar thar hi an ram pumah mipuiten duh lohna an lantir a, sipaiten tharumin an nawr let a. Mi tam tak kut an thlak.

Venhim hna thawktute hian mi 860 chuang an that tawh a, mi 5,000 dawn an man tawh niin Assistance Association for Political Prisoners (AAPP) chuan a sawi.

UN chuan thutlukna a siam khât tak ang siamin Myanmar sipaiten mipui rorelna paih thlaa thuneihna an chan mek chhan let nan he rama ralthuam hralh thin a titawp.

General Assembly hian sipaiten February thlaa mipui thlan roreltute paih thlaa thuneihna an hneh chhuh chu an dem bawk.

UN hian he thil thleng avanga politics hruaitu an man, Aung San Suu Kyi pawh telin, chhuah tur leh sipai sorkar duh lohna lantirtute kutthlakna thleng thin titawp turin a ti bawk.

Hetianga UN-in thutlukna a siam hi mipuite tan a hlawk phak dawn em hriat a ni lo va; mahse, tual chhung indona erawh a hnaih zual phah dawn nia ngaih a ni.

Myanmar-a UN special envoy Christine Schraner Burgener chuan General Assembly-ah hian, “Tual chhung indona lian tak a chhuah palh a hlauhthawnawm tak zet,” a ti a. “Thil thleng thlir hian sipai rorelna hnuh thlak leh turna hun hi a awm tawh mang lo,” a ti.

Myanmar rama ralthuam hralh khapna tura thupek siamna tur vote lakah hian ram 119-in an thlawp laiin Belarus chauhvin a duh lo.

Ram 36 erawh an hai a, heng zingah hian Myanmar nena sipai lama inkawmngaih tak, Russia leh China pawh an tel.

Vote thlaknaa hai tam zawk hian tuna an buaina chu Myanmar ram chhung bil buaina nia an ngaih vanga inrawlh tul ti lo an ni a. Ram thenkhat chuan kum li liam taa mipui sorkarna a din laia  Rohingya Muslim-te laka sipaite chet vakna nen khaikhinin awmzia  a awm lo niin an sawi a. He thil thleng avang hian Rohingya Muslim maktaduai dawn chuan an ram chhuahsana an tlanchhiat phah.

EU atanga UN ambassador, Olof Skoog chuan thutlukna siam thar chuan sipai sorkarna chu dan lo tiin a hnawl ta a, anmahni mipuite laka tharum an thawhna thin pawh a dem tih a sawi.

Myanmar-a mipui sorkarin UN palai atana an tih, Kyaw Moe Tun chuan General Assembly-in hetiang thu an pass har lutuk chu pawi a tih thu a sawi ve bawk.

Human Rights Watch chun thla hmasa daih tawhah khan UN General Assembly hi Myanmar hnena ralthuam hralh thin titawp turin a lo ngen tawh a, “Thutlukna siam hian dan ang tak chuan hna thawk lo mah se politics lam na takin a nghawng dawn,” an ti.

“Sorkarten Myanmar sipaite hnena ralthuam hralh phal zelna hian an mite chungah hleilenna nasa tak a thlen a ni,” an ti a. “Ralthuam leitir khap hian mipuite laka sipai chetna tam tak a veng thei,” an ti bawk.