Congress-ah mi thar 70%

Uttar Pradesh viltu Congress General Secretary Priyanka Gandhi Vadra-i chuan state inthlan turah hian an party hminga chuh tur mi 166 an puan zinga 70% zet chu mi thar a telh.

Gandhi-i hian an candidate zinga 40% chu hmeichhia an ni dawn tih  a sawi tawh a, hun rei tak thuneihna an chan tawh lohna hmunah bul \an thar nan mi thar an telh zui leh teuh a ni.

Chuhtu tur an puan tawh mi 166 zinga 119 zet chu mi thar an ni dawn tih party thupuangtu, Anshu Awasthi chuan news agency PTI a hrilh.

“Thalai zawkte tan hmun siamsak an ni,” tiin Awasthi chuan chuhtu tur mi 125 an puan tawha 26 chu kum 35 hnuai lam an nih thu a sawi bawk.

Mi thar zingah Unnao pawngsual tuartu nu, Asha Singh; CAA dotu, Sadaf Jafar; ASHA worker Poonam Pandey; Adivasi hnam tana beitu, Ram Raj Gond te a tel.

Hmeichhiaah social activist Bhawana Valmiki, Yasmin Rana, Salma Agha Ansari, Kalpana Singh, Sukhvinder Kaur te chu vawi khat nan an chuh ang.

Samajwadi Party hruaitu leh Uttar Pradesh chief minister lo ni tawh, Akhilesh Yadav chuan thla leha an state assembly inthlan turah a chuh ve dawn a. Assembly inthlan a chuh vawi khatna turah hian an chhungkaw hungna hmun, Mainpuri district-a Karhal bialah a chuh ang.

A hma pawhin he bialah hian a ding dawn nia sawi a lo awm tawh a; mahse, Inrinni khan a pate, an party Rajya Sabha MP Ram Gopal Yadav chuan tichiangin ‘record’ siamin a tling dawn tih a sawi.

Karhal bialah hian kum 1993 hnu lamah chuan kum 2002-a BJP an thlan tih loh chu SP candidate zel thlan tlin an la ni a. Kum 2007 khan Yadav-a party-in la let lehin tunah hian Sobaran Yadav-a vawn lai a ni.

Mainpuri Lok Sabha bialah assembly bial nga a awm a, Yadav-a pa, SP dintu ni bawk, Mulayam Singh Yadav-a chu Lok Sabha member atan vawi nga zet thlan tlin a lo ni tawh.

Karhal hi Yadav chungkaw khua, Saifai atanga km nga chauhva hla a ni bawk.

Yadav-a hian an state-a party tenau dangte thawhpuiin BJP paih thlak a tum hle.

November thla khan inthlan a chuh ve dawn loh thu a lo sawi tawh a; mahse, an party thu thu niin thutlukna chu a huho thu ang zawk a nih tur thu a sawi.

December khan NDTV hnenah, “Party-in an duh a nih chuan ka chuh ve ang. A hma pawhin party thu a ni tih ka sawi tawh kha,” a ti a. A hnu leh lamah pawh chuh ve tura ngaih theihin a sawi nawn leh bawk.

Yadav-a’n inthlan a chuh ve tur hi BJP-in a bial him, Gorakhnath-a Chief Minister Yogi Adityanath an dintir vangin chuh ve ngei duhna a siam phah nia sawi a ni.

An pahnih hian an hmingthatna hmunah ve ve an chuh dawn a, Karhal-ah hian Gorakhnath hmain vote an thlak ang.

Yadav-a hi Uttar Pradesh-a Azamgarh bialtu Lok Sabha MP a ni mek a, inthlanah hian a chak a nih chuan a bial mite hnenah kalsan phalna a dil a ngaih dawn thu a sawi.

Uttar Pradesh hi bial 403 inthlang tur niin thawh sarihin February 10 atangin an inthlang tan dawn a. March 10-ah vote tlate chhiar a ni ang.