Aizawl September 21, 2022 : United Pentecostal Church of North East India (UPC NEI) chuan Mizoram UPC ten Supreme Court of India-ah Special Leave Petition (SLP No. 22972 of 2015) an thehluh chu September 7, 2022 khan hearing neih niin Supreme Court chuan a hnawlsak a, High Court Order chu a dingchang zui tak avangin Deputy Commissioner, Aizawl-ah an Biak In kharsak te chu an kuta hlan turin ngenna an thehlut.

DC hnena an lehkha thehluh-ah hian (UPC NEI chuan, "Min chhuahsantu, ‘Mizoram UPC’ intiten kan property min chuhna thubuaiah Hon’ble Gauhati High Court chuan Mizoram UPC te chu thiamloh chantirin an kohhran din ni, April 1, 1995 hma lama UPC Kohhran bungrua engmah chuh theihna an nei lo, tiin thuremna (Judgment Order) dt. 30.1.2015-ah khan a tichhuak a. High Court order chu appeal tumin Hon’ble Supreme Court of India-ah Special Leave Petition (SLP No. 22972 of 2015) an thehlut leh a. Hon’ble Supreme Court chuan September 7, 2022-ah khan hearing neiin SLP an thehluh chu hnawlsak (dismissed)-in High Court Order chu a tungding leh ta a. Heti a lo nih takah chuan Aizawl khawpui chhunga kan Biakin, Court thubuaia lut tel lo, buai pumpelhna atana Aizawl DC-in min kharsak, Aizawl DC Custody-a awm mek, heng a hnuaia mite hi kan kutah min hlan tawh turin kan han ngen che," tiin an ziak a ni.

UPC NEI ten DC hnena Biak In khar an kuta hlan tura an tih te chu -  Bungkawn Biakin, Tuikual North Biakin, Ramhlun South Biakin, Durtlang M-5 Biakin, Govt. Complex Biakin leh  Chawlhhmun Biakin te a ni a, an lehkha thehluh-ah hian Hon’ble Supreme Court leh Gauhati High Court Order pawh an thil tel a ni.