DOWNLOAD OUR APP

Read latest news on your phone
app-store

US-in Ukraine hnenah $ mtd 800 hu ralthuam pe dawn

Mar 16, 2022

Ukrainian president chuan United States Congress-ah video link hmangin thu a sawi dawn a. Hetih lai hian US hian $ maktaduai 800 man hu hmanrua a pe dawn. Zelensky-a hian Russia-in an ram a rûn mek lo dang turin Nato tangrualte chu pui turin a sawm nawn leh ngei rin a ni a. US chanchinbute chuan US hian anti-armour leh anti-aircraft ralthuamte pawh a pek tur zingah hian a tel dawn niin an tar lang bawk.

Ukrainian president chuan United States Congress-ah video link hmangin thu a sawi dawn a. Hetih lai hian US hian $ maktaduai 800 man hu hmanrua a pe dawn.

Volodymyr Zelensky-a thu sawi hun hi India ram sanaa Nilaini zan hian a ni dawn a, he chanchin buatsaih lai hian eng nge a sawi hriat hman a ni lo va; mahse, Russia-in an ram a rûn mek lo dang turin Nato tangrualte chu pui turin a sawm nawn leh ngei rin a ni.

Khawthlang ram tangrualte hi an ram chung zawna Russian thlawhnate thlawh khapsak turin a ngen nawn leh pawh rin a ni.

Zelensky-a hian Nato hnenah hian an ram chunga thlawhna thlawh phal lo turin a lo ngen tawh thin a; mahse, an la pawmpui lo.

Ukraine chunga thlawhna thlawh phal loh a nih hian Nato sipaiten awlsam takin Russian thlawhna thlawk bik chu an hmu thei ang a, awlsam taka kah theih an ni dawn a ni.

Ukrainian president hian US leh EU hnenah pawh Polish MiG-29 fighter jet-te chu pe turin a lo ngen tawh a; mahse, Joe Biden-a chuan Nato member ramte an chu indonaa hnuh luh mai an nih a hlauh avangin a la pawmpui lo.

Hetih lai hian President Biden-a chuan Ukraine hi $ maktaduai 800 man hun zet sipai hmanrua a pe dawn tih a lo puang tawh a. US chanchinbute chuan anti-armour leh anti-aircraft ralthuamte pawh a pek tur zingah hian a tel dawn niin an tar lang.

Ukraine a tanpuina tur hi kar hmasa khan Congress chuan pawm tawhin tanpui ngaite puihna, invenna leh ei bar dinhmuna inpuihna huanga telh a ni.

Thawhlehni khan Biden-a pawhin a hming ziah hnan tawhin Russian President Vladimir Putin-a’n Ukraine a rûnna chuan khawvel mipuite a tipumkhat niin a sawi.

New York Times chanchinbu chuan nikumah pawh khan Biden-a sorkar hian Ukraine hnenah hian $ tluklehdingawn 1.2 hu zet ralthuam a pe niin a tar lang a. A pek zingah hian Mi-17 helicopter, patrol boat leh ralthuam tenau, grenade launcher leh machine gun te pawh a tel niin a sawi.

Hetih lai hian Nato ram defence minister-te chu Belgium-a Brussels khawpuiah Russia-in Ukraine a rûn mek chungchang an ngaihdan leh an chhan let dan turte an sawiho bawk.

Biden-a hi karlehah hian Brussels zin tura ngaih a ni a, Nato-a a thawhpuite kawmin European Union hruaitute a kawm nghal bawk ang.

White House press secretary Jen Psaki chuan US president hian ‘Russian-te lo dan kir dan kalpui mek leh invenna lam a sawipui hlawm dawn’ niin a sawi a. An ram chu Nato-a a thawhpuite lamah nghet taka tangin an thutlukna ang zel chu a pawmpui tih a sawi.

Thawhlehni khan Poland, Slovenia leh Czech Republic prime minister theuhte chuan President Zelensky-a chu indona kal mek chungchangah hian an kawm bawk a. Ukrainian khawpuia curfew puan tan mek laiin an inbia a ni.

Kyiv khawpuia an inkawm zawhah Czech hruaitu chuan Ukrainian mipuite chu ‘anmahni chauhvin an tang lo’ tih a sawi a. Anmahni tlawhtute leh khawthlang ramten an ngaihven reng tih a sawi.

Prime minister pathumte hi khawthlang ram hruaitute zinga Russia-in a rûn hnua Ukraine ram tlawh hmasa bertute an ni.

Share now