US sipaite chuan Al-Qaeda hruaitu lawk Ayman al-Zawahiri chu Afghanistan-ah Pathianni khan an kap hlum tih US President Joe Biden chuan a sawi. Central Intelligence Agency (CIA) chuan beihpui hi an thak a, drone hmangin Zawahiri awmna hi an kap a, a hmunah a thi nghal a ni. 

CIA te hian Afghan khawpui Kabul-a Zawahiri chenna chu drone hmangin an bei a, a chhungte erawh chu an zuah thung. US President Joe Biden chuan, "Zawahiri hi al Qaeda hruaitu a ni a, a birukna hmun atangin an pawl hmun hrang hrang a mite chu a thunun a ni. US beihna hrang hranga ruahmanna siamtu a ni a, tunah chuan a chanpual a hmu ta a ni," tiin a sawi. 

Kum 71 mi Zawahiri hi Bin Laden-a thachhang dawltu zinga mi a ni a, hun rei tak chhung chu thah tuma veh a ni tawh. Zawahiri hi Osama Bin Laden nena inlaichinna nei tha tak a ni a, kum 10 liam taa World Trade Centre beihna pawh kha an pahniha an ruahman nia sawi a ni. US sawrkarin 'most wanted terrorist' a puan zingah pawh a tel a, thah tum hian rei tak chhung an en thla a ni. 

US official chuan Zawahiri hi an sipaiten an beih lai hian balcony-ah a awm a, missile-in tum hnih an kap tih an sawi. An kah lai hian a chhungte pawh an awm a; mahse, hliam an tuar lo a, Zawahiri chauh hi an kap fuh tih an sawi.