Uttarakhand-a Chamoli district, Niti phiakuama Zirtawpnia vur tawlh thut avangin mi pariat an thi a, mi dang paruk hliam na tak an awm bawk.

“Mi 384 chhanchhuah an ni a. Hliam paruk chu an na hle a, ruang pariat phawrh tawh a ni a, chhanchhuah hna thawh mek zel a ni,” tiin Indian Army chuan a sawi.

Chief Minister Tirath Singh Rawat pawhin nimin khan thlawhna atangin chhiatna thlenna hmun hi a thlir kual a, National Disaster Response Force (NDRF) tirh luh an ni a, chhanchhuah hna thawh mek zel a ni tih a sawi a. Inbiakpawhna erawh a la tha lo tih a sawi.

“Union Home Minister Amit Shah pawhin nizanah min bia a. NDRF leh district thuneituten hna an thawk mek a. ITBP leh BRO pawh hriattir nghal an ni a, a rang thei anga chhanchhuah hna thawh a ni. BRO hian inkalpawhna lam an buaipui nghal a; mahse, a la tlang thei lo,” a ti.

Chamoli district-a hmun sang lai hi tun ni thum kal ta chhung khan ruah leh vur a tla nasa hle a. Hei hi tuna chhiatna thlen chhana ngaih a ni.