Vaccine dose khatna pek tam lamah India-in US khûm

Admin - Jun 06, 2021

Mi tam zawk hnena invenna pe tur hian hun tam zawk mamawh a nih thu a sawi

NITI Aayog member, Dr VK Paul chuan India chuan COVID-19 vaccine dose khatna pek tam lamah United States a lehpel ta niin a sawi.

“Sorkarin a chhinchhuah dan chuan India-ah hian hri leng laka invenna damdawi dose khatna hi mi vaibelchhe 17.2 an tling tawh a. Dose khatna pek tam lamah hian US chu kan lehpel ta a ni,” tiin Paul chuan a sawi.

Mi tam zawk hnena invenna pe tur hian hun tam zawk mamawh a nih thu a sawi a, “Hri kai an tlahniam a, hei hian January leh February-a kan awm dan ang mai khan kan inthlahdah leh thei a, chuti a nih chuan hri hi a lo kir leh ang. Invenna hi hun thaah hian a tam thei ang ber pek kan tum tur a ni,” a ti.

Union health ministry-a Joint Secretary Lav Agarwal chuan damlo enkawl mek an tlakhniam chungchang sawiin, “Ni khata hri kai mi 100 hmuh chhuah tlin lohna district a pung zel a, district 257 zetin ni khatah mi 100 chuang kai awm lohna a awm tawh,” a ti.

Ministry chuan district 377-ah hri kai endik atanga hmuh chhuah zat bi (positivity rate) 5% tling lo a awm tawh bawk.

India-ah hian COVID-19 hri kai hmuh chhuah zat hi nasa takin a tlahniam mek zel a. Darkar 24 liam ta chhungin a hma nia kai hmuh chhuah aiin 11,835 zetin a tlem zawk.

A hma niah mi 1,32,364 kai hmuh chhuah a nih laiin darkar 24 liam ta chhung khan mi 1,20,529 hmuh chhuah an ni a. Mi 2,86,94,879 kai an awm tawh tih health ministry chuan a sawi.

India-ah hian hri kai enkawl mek pawh tlahniam zelin mi 15,55,248 an la awm a. Darkar 24 liam ta chhungin 1,97,894 zetin a tlahniam leh hman a. Ni kua chhung a zawnin mi nuai hnih tling lo an ni tawh.

Share now