Mi pakhatin Covid vaccine hman pawlh chu zirchianna thenkhatah a latu taksaah hri kai lo tura chakna a siam tam zawk nia a lang a, hetih rual hian thutlukna siam tur erawh chuan la zir zui deuh a la ngai tih AIIMS chief Dr Randeep Guleria chuan nimin tuk khan NDTV hnenah a sawi.

“Hei hi a hma lamah pawh mi sawi leh ngaihven kha a ni a. A dose hmasa zawk hi damdawi lakna a ni a, a dawt leh hi a thawh tur ang thawk tura tihchakna a ni a. Data thenkhatah chuan dose khatna leh hnihnaa damdawi (vaccine) inang lo hman hian side effect a nei nasa tih a ni a; mahse, data dang lehah chuan taksaah hri ngaia neih theihna leh invenna a siam tha zawk tih hmuh a ni,” tiin Dr Guleria chuan a sawi.

“Zir chian lehzual a ngai a. Nakinah chuan vaccine hi chi hrang hrang a la awm dawn a. Pfizer, Moderna, Sputnik V leh Zydus Cadila pawh a la awm ang. Hman pawh hi a tha zawk tia sawi theih a la awm tam lo va; mahse, zir chian lehzual ngai tak thil a ni,” a ti.

Vaccine hman pawh chungchangah hian sorkar pawhin hma a la a, enchhinna neiin thla reilo te hnuah chuan a chian mai a rin thu a sawi bawk.

Vaccine inang lo hman chungchangah hian thla hmasa khan The Lancet-ah British miten an zirchian thuakna an chhuah tawh.

An enchhinnaah hian dose hmasa zawkah AstraZeneca (Covishield) pein dose hnihnaah Pfizer (India-a awm ve lo) an pe a, heng mite hian side effect an neih chhung a rei lo zawk hle tih an tar lang a. Hri a do hneh em tih lam erawh tar lan theih an la nei lo.

News agency Reuters-in Spanish miten an zirchianna a tar lanah pawh vaccine inang lo hman hi a him a, a tih tur hna a thawk tha bawk tih an sawi.

Dr Guleria hian India-a hmuh chhuah, Delta variant atanga insiam danglama hri thar chhuak leh, Delta plus an tih chu invennain a ngam lo nia sawi chu a ni lo tih a sawi a, a thawh dan kimchang hre tur erawh chuan zir chian a ngaih thu a sawi.

Invenna lak pawimawhna pawh a sawi a. “Vaccine hi a bikima i lak hnuah hri kai i awmpui chuan i kai leh ang; mahse, na taka i awm theihna laka a veng ang che,” a ti.

Dose khat chauh lak chu Delta variant-ah a thawk nep tih a sawi a. Medical lam zirchianna chuan dose khat hian 33% chauh a ven laiin dose kim chuan 90% dawn a veng niin a sawi.

“Hei hi dose khat chauh lak him lohna a ni a. Vaccine lak hmasak tihchak lehzualna tur, kan himna tura dose hnihna lak a pawimawh em em a ni,” tiin a sawi bawk.

Delta plus thlithlai reng

India rama Covid-19 chi thar hmuh chhuah, Delta variant an tih atanga insiam danglam, ram pawn lama hmuh chhuah, Delta plus an tih chu India ramah a rawn lut veleh tan mek a. He hri hi an thlithlai reng tih Dr Guleria chuan a sawi.

“Sorkarin ngun takin a vil reng a; mahse, tunah rih hi chuan Delta' strain zawk hi kan ramah chuan a buaipuiawm rih zawk a ni,” a ti.

“Delta plus variant hi kan thlithlai ngun hle a, Delta plus hi India-a tam ber chu a la ni rih a, kan buaipui a la ngai. Kan chhui zel a, he variant hian kan mipuite hi eng ang chiahin nge a luhchilh tih kan thlir zel dawn a ni,” a ti.

India-ah hian Delrta plus hi mi 48-in an kai tih hmuh chhuah a ni tawh a, heng mite hi state 11-a mite an ni.

Dr Guleria hian thawh thumna lo thleng thei tia an sawi chu a thleng a nih pawhin thawh hnihna aiin a nat loh a ring.

“Inhnialna a tam a; mahse, a nat loh zawk ka ring a ni,” a ti.