ZALEN April 22, 2025 : Vairengte Kuhva Chingtu Co-operative Society, Bilkhawthlir Kuhva Chingtu Co-operative Society leh Hachhek Bial Kuhva Chingtu Pawl Joint Committee chuan dan loa ramdang kuhva man sa, Kolasib District Magistrate-in lilam/auction-a a hralh hi pawi an ti a. Kuhva tawlhru thinte thil tum leh duhthusam anga rorelna kalpui a ni ta mai hi Kuhva chingtute tan a lungchhiat tak zet a ni, an ti.

VBH Joint Committe chua, "Mizoram a kuhva chingtuten theih tawp chhuahin chhun zan zawmin, dan lo a kuhva tawlhrute dang turin tha kan lo seng tawh thin a, engemawzat manin a hmuna tih riral nghal a ni a, Mizoram Police kutah thahnem tak hlan a nih bakah, a awmna kan report atangin engemawzat man a ni bawk."

"Kuhva chingtuten hah taka kan man te leh kan report atanga Police in an man sa te tih riral dan tur relhonaa kuhva chingtute sawm kan ni ve lo hian tih riral dan turah tum lawksa an nei tih a ti chiang hle. Sawrkar-ah beiseina sang tak kan neih mek laiin, thil la thleng ngailo, kuhva man sa lilam-a hralh a ni ta mai hi District thuneitute phena kuhva smuggler-te samphiar zawm sawrkar thuneitu sang zawkte ruahmannaah kan ngai," an ti bawk.

VBH Joint Committee te chuan, "Dan lo a Mizoram a Kuhva tawlhru thinte hian an kuhva man sa te hi ukil ruaiin lilam a tiral turin thuneitute an lo sawipui tawh thin a. Hei hi tihpuitlin a nih chuan keini Mizorma kuhva chingtute tan a him dawn lo hle ni a hriain thuneitute hnenah pawh kan lo sawi tawh thin," an ti.

"Dan loa kuhva tawlh thin ten Mizoram kuhva market a tih buai em em laia hetianga kuhva man sa lilam-a tihral a nih chuan kan market a chhe leh zual dawn a ni. Mizoram a kan kuhva thar chhuah hralh hun hi thla reilote chhung chauh a ni a, hetianga kuhva sawngbawlsa leh dan loa ramdang atanga tawlhruk man tawh lilam a hralh theih a nih chuan kum tluanin kuhva tawlhru te tan kawng hawn sakna ah kan ngai a. Kuhva tawlhru thinte hian Mizoram sawrkar kuta luhtir a, lilam hmanga leichhuah leh mai hi an thiltum leh thiam taka an sawi fo thin a ni," an ti bawk.

VBH Joint Committee chuan, "Mizoram sawrkarin Kuhva chingtute aw aia kuhva tawlhru thinte aw a ngaipawimawh zawk ta mai hi mak kan ti a. Tun hnu-ah ramdang atanga danlo a kuhva tawlhruk man sa te lilam hmanga hralh tawh lo turin thuneitute kan ngen e. Kuhva lilam hi tutenge lei, a leitu tur an thlan dan leh lilam chhangtute hming leh an leina rate-te puangzar turin Mizoram sawrkar kan phut a. Restricted tender anga auction kalpui hi a himlo hle a, kuhva tawlhru thinte hian anmahni hming langloin man sa te hi an leichhuak leh zel thei dawn tihna a ni," tiin an lungawi loh thu an sawi.

"Kuhva man sa te tih riral dan tur chungchanga Kolasib District Magistrate in an buaina a sawite hi chhuanlam tlingah kan ngai lo. Phumbo na tur an duh anih chuan a phum bo na tur ram chu kuhva chingtu ten kan ngaihtuahsak thei. Kuhva man sa halral anih dawn chuan sum tam tak sen ral a ngaih dawn thu leh environmental issue nasa tak a awm thei dawn ni a thuchhuah pawh hi sawrkar sum sen ngailo leh envirommental issue buailoin kan halral sak thei reng a ni tih thuneitute kan hriattir e," an ti.