Aizawl October 17, 2022: Pathianni Chawhnu lama Setlak Kai, Tlawng luia chesual Lallianhnuna, kum 27,  Vaivakawn chu zawn chhunzawm mek niin vawiin lamah khawtlang hnatlangin zawn a ni a, Tui tla zawng hian Vaivakawn bakah, Nghalchawm, Sihhmui leh Sairang khua atangin an thawk chhuak a ni. 

Tlawng setlak kaia chesual Lallianhnuna hi an chetsualna chhak lam Quarry a hnathawka awm an ni a, nimin khan a thianpa nen Tlawng, Setlak kaiah hian cheng dunin ralleh lam an hleuh kai an tum laiin suar -ah a lenlut ta a ni. A tui chenpui a thianpa sawi danin a thianpa tuitla chu zuk hmu hman mah se, a awmna atang a hlat deuh vang leh tui a chak avangin a chhan thei mai lo tih a sawi. 

Vawiin lama Tuitla zawnnaah hian Bialtu MLA Minister Lalruatkima chuan kal chilhin tuitla zawnga hnatlang thawk chhuak te mamawh ei in tur chi hrang hrang bakah, Hulhliap sakna tur Silpauline engmawzat a pe a ni.