Aizawl August 12, 2024 : Vawiin hian MNF Legal Board chuan Vanglaini nitin chanchinbu thuziak chungchangah AMC Ward VI by Election Returning Officer Mark Lalthanliana hnenah lehkha a thehluh.

MNF Legal Board chuan he lehkhaah hian, "Vanglaini, Mizo Daily newspaper, 9th August, 2024 (Zirtawpni)-a chhuakah khan phek hmaah 'ZPM leh BJP candidate-ten nomination paper an thehlut' tih thupui kaihhnawiha thuziakah khan mipui rilru dik lo taka hruai pen tumin, 'MNF Candidate Lalrinfeli chuan August ni 7 khan hming a lo pe lut tawh a ni,' tiin tarlan a ni a. Lalrinfeli hi MNF candidate ni loin, Independent candidate, MNF leh Congress Party ten an thlawp a ni a, nomination pawh i hmaah ngei 7th August 2024 khan a rawn thehlut a nih kha," tiin ziah a ni.

Hei bakah hian MNF Legal Board lehkhaah chuan Caption/ Headline dik lo hmangin an mipui rilru hruaikawi tumah MNF chuan Vanglaini an puh a. "Hetianga mipuite tichiai thei zawng leh nomination file danah pawh MNF Candidate anga file lo a nih hre reng chunga Vanglaini chanchinbu-in thu a chhuah ta mai hi a rang thei ang bera tihdikna (corrigendum) siam a, ngaihdam dilna anmahni chanchinbu ngeiah chhuah tura thu pe turin kan ngen a che," tiin an ziak bawk a ni.