November 29, 2023; AMC hotute leh Aizawl City Local Council Association (ACLCA) hruaitute chuan nimin khan AMC Mayor Office Chamber-ah Joint Meeting neiin Aizawl khawpui chhunga vawk vulh chungchanga inkaihhruaina dan an enho.

June ni 28, 2023 a AMC Board of Councillors meeting in thutlukna a lo siam tawh angin Aizawl khawpui chhung a lo thianghlim a, mipui kan lo hrisel zawk nan leh leimin vanga chhiatna thleng a tlem zawk theih nan mihring chenna in atanga feet 100 aia hnaia vawk vulh chu January ni 15, 2024 atangin khuahkhirh a ni dawn a ni.

Meeting hi Aizawl Mayor Lalrinenga Sailo in a kaihruai a, Executive Corporators, Municipal Commissioner, Officer dangte leh ACLCA hruaitute an tel a ni. AMC in vawkvulh chungchanga inkhaihruaina dan a lo duan te chu uluk taka sawiho a ni a, members ten tha an ti tlang hle a ni. Aizawl khawpui chhunga vawk vulhtu zawng zawng ten vawkvulh kawnga inkaihruaina dan zawm theuh turin AMC leh ACLCA te chuan an ngen a ni.

Vawkvulh chungchanga harsatna bik neite chuan Local Council atanga recommendation lain AMC-ah exemption dilna thlen theih a ni dawn a ni.