Venezuelan khawpui pakhat, Caracas-ah venhim hna thawktute leh mi sual pawl (armed gang)-te chu nasa takin an inbei mek.

Nilaini atanga inkahna thleng tanah hian sorkar chuan thi leh hliam zat puang lo mah se tual chhung chanchinbute chuan mi 10 chuang an thi tawh niin an sawi.

An ram chin zauh tuma bei mek gang hruaitute man tur leh an pawla mite ralthuam nan turin officer eng emaw zat tirh luh an ni.

A bul hnaia cheng pakhat chuan thil thleng chu ‘indona ang mai’ a nih thu a sawi.

Social media-a thlalak leh video thehdarhah chuan Zirtawpni khan Cota 905 venga silaimu chharte pawh an tilang nasa hle.

Officer pakhat chuan thuneitute chu a dinhmun tha zawkah an ding tawh niin AFP news agency hnenah a sawi a; mahse, ralsai thiam tlem an la awm thei nia an hriat avangin an la fimkhur hle.

Venhim hna thawktu mi 800 chuang tirh luh niin in tin an dap chhuak.

Interior Minister Carmen Meléndez chuan police-te hian sual rawngbawl thinte hmunpui an luh chhuah   a, thil rapthlak tak tak thlenna thin chu an thunun tawh tih a sawi.

Officer-ten gang-hovin an ruk bote an chhuah zalen a, a tul chen chen an awm chilh dawn tih a sawi bawk.

Venezuelan sorkar hian gang boss-te man theihna tura puitute hnenah $5,00,000 pek an tiam.

Tun tuma sorkar sipaite chet chhuah hi kum tam tak chhunga gang-te beia an chet chhuah lian ber niin AFP chuan a tar lang.

Sorkar hian eptuten ram dang atanga puihna dawng chungin President Nicolás Maduro chu paih thlak tuma beihna remchangah gang-ho hi an hmang niin a sawi.

Mihring dikna chanvo humhalhtu pawl chuan tharum thawhna thleng nasa thin lutuk chu an duh lo va, a mi chengte tan a him lo tak zet niin an sawi thin.

Inkahna a thlena thi an awm chuan civil mite hi an in chhuahsanin hmun him an pan a, silaimu tawn palh hlauvin a theih ang angin an biru thin.

“Hlau leh thabarin kan awm reng mai a ni,” tiin Cota 905-a cheng pakhat chuan Associated Press news agency hnenah a sawi.