Thla leh mai khian, Mizo te rimawi khawvela pen khata hmasawn tirtua chhal ngam — Vulmawi Band — chuan an indin tirh atanga kum 40-na hmel an hmu tawh dawn a. He an jubilee pualin re-union neih an tum. An inbuatsaih chho mek a ni. Khawvel huap pawha kan hriat lar band leh group hrang hrangin, an hun pawimawh chu fans tan lawm an tum hram hram thin a, kehdarh tawh mah se re-union te neiin 'Farewell tour' te an nei thin. Chutiang bawkin Vulmawi Band pawhin an kum 40 tlin champhaphak chu November thla tirah, ni hnih awh turin lawmna hun buatsaih an tum a. Mahse, an chawr chhuahna Tahan lamah lawmna pui ber buatsaih an tum a ni. Vulmawi band member te hi an awm darh hle a. Hriat theih chinah — Tawnenga hi Switzerland-ah awmin, Lalruanga hi USA-ah a khawsaa, Hmingliana hi Yangoon-ah awm ve thungin, Buta leh Siama te unau Aizawl-ah an inbengbel a. Band member zingah pali (4) chuan chatuan ram an pan tawh thung. Member thenkhatin he khawvel chhuahsan tawh mah se; a la dam te chuan an band-in hun chhinchhiahtlak an tawng chu lawm ngei tumin an inbuatsaih chho tan a. An Ruby Jubilee lawmna hi stage-a an zai ho tawpna a nih ngei hmel tawh a, chuvangin Vulmawi band 'Farewell Show' pawh kan ti thei ang chu. Hetih lai hian, Aizawl-ah Vulmawi Ruby Jubilee atana sum tuakna ni pahfawmin, November ni 5, 2016 zanah Hotel Floria rooftop-ah — Vulmawi Nite — hman a ni dawn a. He hunah hian Siama leh Buta te an zai dawn a. Tunlai zaithiam lar thlan chhuah 10 in Vulmawi hla hrang hrang an sa dawn bawk a ni. Live performance vek a ni bawk ang.