Vur leh thlipui hmachhawn turin

Thlipui chak zawng hi hurricane ang vel a ni dawn tih NWS leh Accuweather chuan an sawi a. Hmarchhak lam state zawng zawngah inralrinna dar khawn niin hei hi kum 2018 hnua a hmasa ber a ni.
    New York, New Jersey, Maryland, Rhode Island leh Virginia state governor-te chuan emergency puangin mipuite chu an sahimna turin khawlaiah chhuak lo turin an ti.
    CBS News chuan thlipui leh vur tla tur kalkawngah hian mi maktaduai 75 zet an cheng niin a sawi.
    New York Mayor Eric Adams chuan Inrinni zan bikah pawn lama zanriah ei chhuah a khap a, invenna pek mek pawh a chawlhtir rih.
    New York Governor Kathy Hochul chuan chhung tin chu ina tawmin ‘beer pack ruk inchhawpin nghak mai turin’ a ti.
    Florida pawhin rei tak an tawn tawh loh khaw vawt an tuar a rinawm a, vur laiking, iguanas pawh a inlar theih rin a ni.

United States khawchhak lam vaukam hrula awmte chu kum li chhunga a vawi khat nana vur thlipui na tak maiin a nuai vel mek a, che hlei thei lo leh inralring takin an awm mek.

Vur nasa taka tla tur hian Carolina state hnih atanga Maine thleng tuam tura sawi lawk a ni a, hurricane tluk zeta chak thli nena kalin vaukam a nuai a. State panga chuan emergency an puang hlawm.

Boston Mayor Michelle Wu chuan an khawpui chuan vur tla an tawn fo avangin mak an ti ngai lo va, tun tum erawh chhinchhiahtlak a nih thu a sawi.

New England-ah chuan vur hi feet hnih zet a tla dawn tih sawi lawk a awm a. Khawchin zirtute chuan vaukamah chuan tui pawh a lian thei tih an sawi lawk bawk.

Vur tla nasa avang hian Zirtawpni leh Pathianni inkara US pan tur leh chhuahsan tur thlawhna 5,000 chuang chu an zin tur thulhtir an ni tih FlightAware chuan a tar lang.

Khawchin thlirtute chuan vur thlipui na tak, Nor’easter a thlen theih thu leh Boston vel chu 2ft (61cm) vel vur tla tur hialin an sawi lawk.

Tun china Boston-a vur tla nasa ber chu kum 2003-a darkar 24 chhunga 27.6in (70cm) tla kha a ni.

Mi thiamte chuan tuna thawk tur hi bombogenesis an tih, boruak vawt tak leh tuipuia boruak lum intawkin boruak nek nat lam a thlak danglam thut ang a thleng thei dawn niin an sawi a. Hetianga a insiam dan hi bomb cyclone an ti.

“Rikrum thil tih lovah chuan zin chhuah phal loh a tul,” tiin National Weather Service (NWS), Boston chuan a sawi.

“I chhuak a nih pawhin thlasika hmanchi hmanrua ken a ngai a, i tang a nih pawhin lirthei chhunga tawm tur,” an ti bawk.

Thlipui na tak hian an ram sanaa Inrinni zing (India-ah chuan Pathianni khaw var hma) khan a nuai tan a. A thlen tak tak hma hian state eng maw zatah vur a tla tawh.