Mizo Society of America chuan NAMTA in a huaihawt tum 'Tribal Solidarity Against Ethnic Cleansing in Manipur,' June 22 leh June 24-a Washington DC a punkhawmnaah MSA member-te chu tel vek turin a sawm a. June 22 hian Prime Minister Narendra Modi chu Washington DC ah a zin dawn a ni.

"Tribal Solidarity Against Ethnic Cleansing in Manipur programme hi 3:30 PM, June 22, 2023 hian US Capitol Ground, Washington DC ah neih tum a ni a, Prime Minister Narendra Modi-an US Capitol chhunga thu a sawi laiin a pawn lamah hun hman tum a ni a. Hetah hian Manipura Tribal-te chunga thil thleng hriat rengna hun (Vigil - zan ven) hman a ni ang a.  June ni 24, 2 PM White House kawt leh Indian Embassy bulah punkhawm huaihawt tum a ni bawk," tiin B.Thanseia, Executive Committee Member, Maryland Branch, MSA, chuan ZALEN a hrilh a ni.

"Kan tih theih tlem hle mah se, kan theihna kawngah kan unaute tan i pen chhuak zel ang u. June 22 hian Indian Prime Minister, Narendra Modi Washington DC a rawn zin dawn a. Kan tih theih chhun, Washington DC ah peaceful demonstration neih turah i kal theuh ang u. June 24 ah kan chhunzawm leh ang a. Maryland branch MSA member zawng zawng te kan in sawm a. MSA kumpuan 'Zofate Inpumkhatna Kawnga Hmalak' hi hre rengin he program thlawp turin Maryland branch Executive Commitee in a sawm che a ni," tiin MSA FB page ah sawmna tarlan a ni.

MSA in an Facebook page a an tarlan danin Manipur-a Zohnahthlahte tawrhna chu MSA chuan pawi a ti a. Biak In 400 chuang halsak ni tawhin, mi pawi sawi lo 70 velin nunna an chan tawh a. Mahni in lum tlansana raltlan sing tel an awm tawh a. MSA pawhin an mahni tanpuina tur sum a tuak mek a ni.