ZALEN April 6, 2025 : Mizoram Legislative Assembly budget session a pass tak, ‘The Mizoram Liquor (Prohibition) Amendment Bill, 2025’-ah rules duan ngai neuh neuh a la awm avang he dan thar hnuaiah hian wine leh beer siam phalna ‘permit’ pek thar an la awm lo.

ZALEN-in Excise & Narcotics Department thawktute hnen atanga thu a dawn danin Hnahlan Grape Growers Cooperative Society leh Champhai Grape Growers Society hnenah chauh wine siam phalna permit hi pek chhuah a ni a, heng society pahnihte hi chuan a hma daih atang tawhin wine siamna permit hi neiin tam tak an lo siam chhuak tawh a. License nei tur hian kum khatah Rs. 15,000 an chawi a ngaih bakah security deposit Rs. 10,000 an dah a ngai a. Hei mai bakah labelling an tihna man atan Rs. 20,000 an chawi a ngai bawk a ni.

Hnahlan leh Champhai winery-ten wine siam phalna hi nei tawh mah se thlai dangah siam phal a nih dawn tawh avangin rules hi tlema siam danglam a ngai dawn a; mahse, hei hi chu thil har a ni dawn lo niin an sawi.

Sawrkar ruahman dan chuan wine hi grape-ah chauh ni lo Mizoram thlai thar chhuah dang balhla, lakhuihthei, kawlthei, sunhlu leh kiwi ahte wine hi siam phal a ni dawn a ni.

Excise & Narcotics Department chuan horticulture department hnenah eng theite nge Mizoramin a neih tih te, khawi hmunahte nge chin uar an nih, eng hunah nge seng a nih tih leh thil pawimawhte an zawt mek.

Hnahlan leh Champhai winery-te hian an thil siam chhuahte hi alcohol awm tur zat 8%-12% inkar a nih a ngai a ni.

Hnahlan winery atang hian ‘Isabella’ siam a ni a, Champhai winery atangin ‘Champwine’ siam a ni thung.

Hetih lai hian beer chungchangah chuan thil thar a nih dawn avangin siam phalna rules hi duan deuh a ngai dawn a. Mizoram chhunga agriculture atanga thar chhuahte hmanga beer hi siam phal a nih dawn avangin beer chungchanga rules siam chu a buaithlak mai thei niin Excise & Narcotics Department thawktute chuan an sawi a, rules pawh an la duang lo niin an sawi bawk.